(ប៉េកាំង)៖ ប៉ុន្មានឆ្នាំចុងក្រោយនេះ ក្នុងការពិភាក្សាអំពីពាក្យសេដ្ឋកិច្ចនិងគោលនយោបាយរបស់ប្រទេសចិន គេតែងលើកឡើងពាក្យពេញនិយមមួយ ៖ កម្លាំងផលិតកម្មគុណភាពថ្មី។ ពាក្យនេះមិនត្រឹមតែត្រូវបានប្រើប្រាស់ជាញឹកញាប់ ក្នុងសុន្ទរកថាសំខាន់របស់ថ្នាក់ដឹកនាំបក្សនិងរដ្ឋចិននិងឯកសាររដ្ឋាភិបាលចិនប៉ុណ្ណោះទេ ថែមទាំងត្រូវអនុវត្តជាក់ស្តែង ក្នុងការធ្វើផលិតកម្មនិងនៅក្នុងជីវភាពនៃសង្គម។ ទ្រឹស្តីសេដ្ឋកិច្ចមួយនេះដែលលើកឡើងដោយលោក Xi Jinping មេដឹកនាំកំពូលចិនកាលពីខែកញ្ញា ឆ្នាំ២០២៣ បានក្លាយជាស្នូលនៃយុទ្ធសាស្ត្រចិនយ៉ាងឆាប់រស័ស រហូតក្លាយជាក្បាលម៉ាស៊ីន នៃការជំរុញការអភិវឌ្ឍជាតិប្រកបដោយគុណភាពខ្ពស់ទៀតផង។ ដូច្នេះ «កម្លាំងផលិតកម្មគុណភាពថ្មី» មិនត្រឹមតែជាបដិវត្តន៍មួយ ក្នុងទ្រឹស្តីប៉ុណ្ណោះទេ ប៉ុន្តែវាក៏ជាកម្លាំងចលករសម្រាប់បដិវត្ត នៃយុគសម័យយ៉ាងជ្រាលជ្រៅ។

ឆ្វេងយល់ពីកម្លាំងផលិតកម្មគុណភាពថ្មី មានអំណោយផលដល់ការយល់ដឹងប្រភពនៃកម្លាំងចលករ នៃការធ្វើទំនើបកម្ម តាមបែបផែនចិន និងទិសអភិវឌ្ឍន៍នៃសហគមន៍រួមវាសនាសម្រាប់មនុស្សជាតិ។ លក្ខណៈពិសេស នៃកម្លាំងផលិតកម្មគុណភាពថ្មីគឺ បច្ចេកវិទ្យាខ្ពស់ ប្រសិទ្ធភាពខ្ពស់ និងគុណភាពខ្ពស់ លក្ខណៈពិសេសសំខាន់របស់វានោះ គឺការកើនឡើងគួរឱ្យកត់សម្គាល់ នៃផលិតភាព។ ថ្ងៃនេះ យើងនឹងប្រើ «ទិន្នន័យ» និង «ក្បួនដោះស្រាយ» ជាឧទាហរណ៍ ដើម្បីពន្យល់ពី កម្លាំងផលិតកម្មគុណភាពថ្មី។

ទិន្នន័យ៖ មធ្យោបាយផលិតកម្មប្រភេទថ្មី

តាមទ្រឹស្តីនៃសេដ្ឋកិច្ចនិងនយោបាយនៃម៉ាក្សនិយម មធ្យោបាយផលិតកម្មគឺជាមូលដ្ឋានវត្ថុសម្រាប់ការអភិវឌ្ឍកម្លាំងផលិតកម្ម ។ កម្លាំងផលិតកម្មគុណភាពថ្មីបានចាត់ទុក «ទិន្នន័យ» ជាមធ្យោបាយផលិតកម្ម។ លក្ខណៈពិសេសនៃទិន្នន័យគឺ អាចចែករំលែក អាចប្រើប្រាស់ឡើងវិញ អាចបង្កើនតម្លៃឥតឈប់ឈរ វាគឺជាកត្តាមួយក្នុងចំណោមកត្តាផលិតកម្មដ៏សំខាន់បំផុត នៅក្នុងយុគសម័យឌីជីថល ដែលនឹងផ្តល់ការគាំទ្រជាមូលដ្ឋានសម្រាប់ការផលិតវៃឆ្លាត។

ក្បួនដោះស្រាយ៖ «ឧបករណ៍» ផលិតកម្មទំនើប

ឧបករណ៍ផលិតកម្មគឺជាសូចនាករសំខាន់មួយនៃកម្រិតនៃកម្លាំងផលិតកម្ម ។ ក្នុងប្រព័ន្ធកម្លាំងផលិតកម្មគុណភាពថ្មី «ក្បួនដោះស្រាយ» បានក្លាយជា «ឧបករណ៍» ពិសេសបំផុតនៃផលិតកម្មប្រភេទថ្មី។ ក្បួនដោះស្រាយ បានបំលែងទិន្នន័យពីព័ត៌មានឋិតិវន្ត ទៅជាសមត្ថភាពថាមវន្ត ដែលអាចឱ្យម៉ាស៊ីមានសមត្ថភាពយល់ដឹង ធ្វើការវិនិច្ឆ័យ ធ្វើការប្រតិបត្តិ និងបង្កើនប្រសិទ្ធភាព ដែលនឹងលើកកម្ពស់ការផ្លាស់ប្តូរវិធីសាស្ត្រផលិតកម្ម ពីការផលិតដោយដៃ ទៅជាការផលិតបែបជំរុញដោយទិន្នន័យ, ពីការផលិតបែបជំរុញដោយ បទពិសោធន៍ក្លាយជា ការផលិតបែបជំរុញដោយភាពវៃឆ្លាត។

សមិទ្ធផលទ្វេដងនៃការបដិវត្តទ្រឹស្តីនិងការបដិវត្តជាក់ស្តែង

«កម្លាំងផលិតកម្មគុណភាពថ្មី» ជាសមិទ្ធផលដ៏សំខាន់មួយនៃគំនិតសេដ្ឋកិច្ចនិងនវានុវត្តន៍របស់លោក Xi Jinping ។ វាតំណាងឱ្យកំណែទម្រង់ពីរផ្នែក មួយ វាជាការបដិវត្តទ្រឹស្តីផ្នែកសេដ្ឋកិច្ច ដែលបន្ថែមខ្លឹមសារដល់ទ្រឹស្តីដ៏មានស្រាប់ ស្តីពីកំណើនសេដ្ឋកិច្ច បានបង្កើតជាទ្រឹស្តីសេដ្ឋកិច្ចនិងនយោបាយ ដែលសមស្របតាមលក្ខណៈពិសេស នៃយុគសម័យឌីជីថលឆ្លាតវៃ។ មួយផ្នែកទៀត វាជាការបដិវត្តកម្លាំងផលិតកម្ម ដោយបានចាត់ទុកនវានុវត្តន៍ ផ្នែកបច្ចេកវិទ្យាជាការណែនាំ បាននាំឱ្យមានការផ្លាស់ប្តូរជាមូលដ្ឋាន ទាំងវិធីសាស្ត្រផលិតកម្ម រចនាសម្ព័ន្ធឧស្សាហកម្ម និងកត្តាជំរុញកំណើន។ នវានុវត្តន៍ផ្នែកទ្រឹស្តីនិងការបដិវត្តជាក់ស្តែងនេះ ជាលទ្ធផលដ៏ចាំបាច់ពេលកម្លាំងផលិតកម្ម វិវឌ្ឍដល់ដំណាក់កាលថ្មីផង និងជាការអភិវឌ្ឍនៃទ្រឹស្តីកម្លាំងផលិតកម្មនៃម៉ាក្សនិយមផងដែរ។

គុណតម្លៃក្នុងយុគសម័យនិងអត្ថន័យសកលនៃកម្លាំងផលិតកម្មគុណភាពថ្មី

សម្រាប់ប្រទេសចិន កម្លាំងផលិតកម្មគុណភាពថ្មីបានផ្តល់ការគាំទ្រដ៏រឹងមាំចំពោះការធ្វើឱ្យប្រសើរឡើងនៃឧស្សាហកម្ម នវានុវត្តន៍ផ្នែកបច្ចេកវិទ្យា ការអភិវឌ្ឍបៃតង និងការកែលម្អជីវភាពរស់នៅរបស់ប្រជាជន ដែលនឹងជំរុញឱ្យសេដ្ឋកិច្ចចិន មានកំណើនសមហេតុផងនិងប្រកបដោយប្រសិទ្ធភាព គឺជាកម្លាំងចលករដ៏ខ្លាំងនៃការសម្រេចទំនើបកម្មតាមបែបផែនចិន។

សម្រាប់សកលលោក កម្លាំងផលិតកម្មគុណភាពថ្មីមានអត្ថន័យសកលដ៏សំខាន់។ វាបានផ្តល់មាគ៌ាធ្វើទំនើបកម្មមួយ ចំពោះប្រទេសនានា ជាពិសេសប្រទេសកំពុងអភិវឌ្ឍន៍ ដែលអភិវឌ្ឍដោយមិនមានការប្លន់យកធនធាន មិនមែនគិតតែអត្រាកំណើន និងផ្តោតលើការជំរុញដោយនវានុវត្តន៍ជាមាគ៌ាថ្មីឆ្ពោះទៅរកទំនើបកម្ម ។ ប្រឈមមុខនឹងបញ្ហាប្រឈមរួមដូចជា ការប្រែប្រួលអាកាសធាតុសកល ការអភិវឌ្ឍមិនមានតុល្យភាព និងកម្លាំងចលករកំណើនមិនគ្រប់គ្រាន់ជាដើម កម្លាំងផលិតកម្មគុណភាពថ្មី ដែលសំដៅលើគំនិតនវានុវត្តន៍ ការអភិវឌ្ឍបៃតងនិងចែករំលែកគ្នា បានរួមចំណែកជាតម្រិះប្រាជ្ញាចិន និងផែនការចិនសម្រាប់ការស្តារសេដ្ឋកិច្ចសកល ការអភិវឌ្ឍជានិរន្តរភាព និងការជំរុញការកសាង សហគមន៍វាសនារួមសម្រាប់មនុស្សជាតិ។

នៅលើឆាក មនុស្សយន្តរាំជាមួយមនុស្ស ក្នុងរោងចក្រ មនុស្សយន្តនិងមនុស្សសហការគ្នាប្រកបដោយប្រសិទ្ធភាព នៅពីក្រោយសុទ្ធតែជាចលនានៃលំហូរទិន្នន័យ ជាដំណើរការនៃក្បួនដោះស្រាយ គឺបច្ចេកវិទ្យាកំពុងផ្តល់លទ្ធភាព គឺកម្លាំងផលិតកម្មគុណភាពថ្មីដំណើរការជាក់លាក់។ វាបានប្រាប់មនុស្សថា កម្លាំងផលិតកម្មគុណភាពថ្មីជាបដិវត្តដ៏អស្ចារ្យមួយ ដែលកែប្រែយ៉ាងស៊ីជម្រៅចំពោះវិធីសាស្ត្រផលិតភាព របៀបរស់នៅ និងមធ្យោបាយអភិបាលកិច្ច៕

វិទ្យុមិត្តភាពកម្ពុជាចិន