(ហ្សាការតា)៖ នាថ្ងៃពុធ ទី១ ខែមេសា ក្រសួងការបរទេសនៃប្រទេសឥណ្ឌូណេស៉ី បាននិយាយថា ឥណ្ឌូណេស៉ីស្នើឱ្យអង្គការសហប្រជាជាតិ (UN) បើកការស៉ើបអង្កេតលើ ការស្លាប់នៃកងកម្លាំងរក្សាសន្តិភាពរបស់ខ្លួន៣នាក់ អំឡុងសង្រ្គាមរបស់អ៉ីស្រាអែលនៅភាគខាងត្បូងប្រទេសលីបង់។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Umar Hadi ដែលជាតំណាងរបស់ក្រសួងការបរទេសឥណ្ឌូណេស៉ីប្រចាំ UN បានថ្លែងដូចខាងលើ អំឡុងកិច្ចប្រជុំបន្ទាន់មួយ​របស់ក្រុមប្រឹក្សាសន្តិសុខ កាលពីថ្ងៃអង្គារ។ អ្នកតំណាងរូបនោះ បានលើកឡើងដូច្នេះថា «យើងទាមទារឱ្យមានការស៉ើបអង្កេតដោយផ្ទាល់ពី​ UN មិនមែនត្រឹមលេសដោះសារបស់អ៉ីស្រាអែលទេ»។

ប៉ុន្មានថ្ងៃចុងក្រោយនេះ កងកម្លាំងរក្សាសន្តិភាពឥណ្ឌូណេស៉ីសរុប៣នាក់ ដែលស្ថិតក្នុងបេសកកម្មរក្សាសន្តិភាពនៅលីបង់ ហៅកាត់ថា UNIFIL បានស្លាប់ ក្នុងឧប្បត្តិហេតុ ២ដាច់ដោយឡែកពីគ្នា។ ក្នុងឧប្បត្តិមួយកាលពីថ្ងៃអាទិត្យចុងសប្តាហ៍មុន គ្រាប់ផ្លោងមិនដឹងប្រភព បានធ្លាក់ចំទីតាំងឈរជើងរបស់​កងកម្លាំងរក្សាសន្តិភាពឥណ្ឌូណេស៉ី នៅភាគខាងត្បូងលីបង់ បណ្តាលឱ្យម្នាក់បាត់បង់ជីវិត។

រីឯក្នុងឧប្បត្តិមួយទៀត កាលពីថ្ងៃចន្ទសប្តាហ៍នេះ រថយន្តរបស់កងកម្លាំងរក្សាសន្តិភាពឥណ្ឌូណេស៉ី២នាក់ ហាក់ទទួលរងការផ្ទុះគ្រាប់បែកដែលបង្កៃនៅជាប់ផ្លូវ ហើយផ្តាច់ជីវិតពួកគេ។ កាលពីថ្ងៃអង្គារ យោធាអ៉ីស្រាអែល បាននិយាយថា ការពិនិត្យរបស់ខ្លួនផ្ទាល់ ទៅលើឧប្បត្តិហេតុពាក់ព័ន្ធកងកម្លាំង UNIFIL កាលពីថ្ងៃចន្ទ បានសន្និដ្ឋានថា កងទ័ពអ៉ីស្រាអែល មិនបានដាក់ពង្រាយគ្រឿងផ្ទុះ នៅក្នុងតំបន់នោះឡើយ ហើយក៏ពុំមានវត្តមានកងទ័ពខ្លួនណាម្នាក់ នៅទីនោះដែរ។

គួរបញ្ជាក់ថា បើតាមការឱ្យដឹងរបស់ UN កាលពីឆ្នាំ២០២៤ ឥណ្ឌូណេស៉ី ផ្តល់កងទ័ពជាង២៧០០នាក់ ចូលរួមបេសកកម្មរក្សាសន្តិភាពរបស់អង្គការសហប្រជាជាតិ ពោលគឺស្ថិតក្នុងចំណោមប្រទេស ដែលចូលរួមចំណែកដ៏ច្រើនមួយ នៅលើពិភពលោក។ ឥណ្ឌូណេស៉ី ក៏បានសន្យាផងដែរថា នឹងចូលរួមបញ្ជូនកងទ័ពសម្រាប់ដាក់ពង្រាយនៅតំបន់ហ្កាហ្សា ក្រោមក្របខណ្ឌនៃកងកម្លាំងរក្សាស្ថិរភាពអន្តរជាតិ ដែលគាំទ្រដោយ UN៕