(វ៉ាស៊ីនតោន)៖ នាថ្ងៃសុក្រ មន្ត្រីសហរដ្ឋអាមេរិកម្នាក់បានប្រាប់ទីភ្នាក់ងារព័ត៌មាន Reuters ថា យន្តហោះចម្បាំងអាមេរិកមួយគ្រឿង ត្រូវបានបាញ់ទម្លាក់នៅពេលហោះហើរពីលើទឹកដីប្រទេសអ៉ីរ៉ង់។

មន្ត្រីដែលសុំមិនបញ្ចេញឈ្មោះរូបនេះ ពុំបានផ្តល់ព័ត៌មានលម្អិតបន្ថែមនោះទេ ប៉ុន្តែបានបញ្ជាក់ថា ប្រតិបត្តិការរុករក និងជួយសង្គ្រោះកំពុងតែដំណើរការយ៉ាងសកម្ម ដើម្បីស្វែងរកអាកាសយានិកដែលបានលោតឆ័ត្រយោងគេចខ្លួន។ រហូតមកទល់ពេលនេះ ទាំងមន្ទីរបញ្ចកោណ និងបញ្ជាការដ្ឋានកណ្តាលអាមេរិក (CENTCOM) នៅមិនទាន់ឆ្លើយតបចំពោះសំណើសុំការអត្ថាធិប្បាយណាមួយនៅឡើយទេ។

គួរបញ្ជាក់ថា ការបាត់បង់យន្តហោះចម្បាំងនេះ គឺជាឧបទ្ទវហេតុថ្មីមួយទៀត ក្នុងសង្គ្រាមដ៏ក្តៅគគុកដែលអូសបន្លាយចូលដល់សប្តាហ៍ទី៥ រវាងសម្ព័ន្ធមិត្តអាមេរិក-អ៉ីស្រាអែល និងប្រទេសអ៉ីរ៉ង់ ខណៈភាពតានតឹងយោធានៅក្នុងតំបន់មជ្ឈិមបូព៌ា កំពុងឈានដល់កម្រិតដ៏គ្រោះថ្នាក់បំផុត។ កាលពីប៉ុន្មានថ្ងៃមុន យន្តហោះ F-15 ចំនួន ៣គ្រឿង ក៏ត្រូវបានប្រព័ន្ធការពារដែនអាកាសរបស់កូវ៉ែត បាញ់ទម្លាក់ដោយការយល់ច្រឡំផងដែរ៕