(តៃប៉ិ)៖ ដោយសំដៅទៅផលប៉ះពាល់នៃសង្រ្គាមនៅតំបន់មជ្ឈិមបូព៌ា ថ្មីៗនេះ រដ្ឋមន្ត្រីសេដ្ឋកិច្ចរបស់កោះតៃវ៉ាន់ បានឱ្យដឹងថារដ្ឋមន្រ្តីថាមពលនៃប្រទេសផលិតឧស្ម័នធម្មជាតិរាវ LNG ធំមួយ បានធានាអំពីការផ្គត់ផ្គង់ដល់តៃវ៉ាន់។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។

ថ្លែងទៅកាន់អ្នកសារព័ត៌មានក្នុងទីក្រុងតៃប៉ិ លោក Kung Ming-hsin បាននិយាយថា ដោយសារតែតៃវ៉ាន់មានទំនាក់ទំនងល្អជាមួយអ្នកផ្គត់ផ្គង់ប្រេងឆៅ និងឧស្ម័នធម្មជាតិ ការកែតម្រូវប្រភពដើមនៃការដឹកជញ្ជូន ឬបញ្ជាទិញគឺមិនចោទជាបញ្ហាទេ។

លោក Kung បានឱ្យដឹងថា ប្រហែលពីរសប្តាហ៍មុន រដ្ឋមន្ត្រីថាមពលនៃប្រទេសផលិតថាមពលដ៏ធំមួយ បានទាក់ទងយ៉ាងសកម្មជាមួយរូបលោក និងបានបង្ហាញនូវការគាំទ្រទាំងស្រុងចំពោះតម្រូវការរបស់តៃវ៉ាន់ ពាក់ព័ន្ធឧស្ម័នធម្មជាតិ។ យ៉ាងនេះក្តី លោក បានបដិសេធបញ្ចេញឈ្មោះប្រទេស ដែល ផ្តល់ការធានាផ្គត់ផ្គង់នោះ។

គួរបញ្ជាក់ថា​ តៃវ៉ាន់ដែលជាមជ្ឈមណ្ឌលផលិតគ្រឿងអេឡិចត្រូនិកដ៏សំខាន់​ ពឹងផ្អែកលើកាតា សម្រាប់ប្រហែលមួយភាគបីនៃឧស្ម័ន LNG មុនពេលមានសង្រ្គាម ហេីយធ្លាប់និយាយថាខ្លួនទទួលបានការធានាផ្គត់ផ្គង់ក្នុងរយៈពេលប៉ុន្មានខែទៅមុខពីប្រទេសមួយចំនួន​ រួមទាំងអូស្ត្រាលី និងសហរដ្ឋអាមេរិក៕