(ឡាហាវ៉ាណា)៖ នាថ្ងៃអាទិត្យ សមាជិកសភាអាមេរិកចំនួនពីររូបមកពីគណបក្សប្រជាធិបតេយ្យ គឺលោកស្រី Pramila Jayapal និងលោក Jonathan Jackson បានបញ្ចប់ដំណើរទស្សនកិច្ចរយៈពេល ៥ថ្ងៃ នៅប្រទេសគុយបា ដោយបានអំពាវនាវឱ្យរដ្ឋបាលលោក ដូណាល់ ត្រាំ «កាត់បន្ថយការប្រើពាក្យសម្តីតឹងតែង» និងបញ្ចប់ការបិទខ្ទប់ថាមពល ដែលកំពុងបង្កការឈឺចាប់ដល់ប្រជាជនគុយបា។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ដំណើរទស្សនកិច្ចនេះ គឺជាគណៈប្រតិភូអាមេរិកដំបូងគេដែលទៅដល់គុយបា ចាប់តាំងពីលោក ត្រាំ បានដាក់វិធានការបិទខ្ទប់ប្រេងឥន្ធនៈដោយប្រយោល ដើម្បីដាក់សម្ពាធលើរដ្ឋាភិបាលកុម្មុយនីស្តគុយបា។ សមាជិកសភាទាំងពីររូបនេះ បានជួបពិភាក្សាជាមួយប្រធានាធិបតីគុយបា លោក Miguel Diaz-Canel និងមន្ត្រីជាន់ខ្ពស់ក្រសួងការបរទេសគុយបា ដើម្បីស្វែងរកផ្លូវចាកចេញពីភាពជាប់គាំងនេះ។

គួរបញ្ជាក់ថា ទំនាក់ទំនងរវាងអាមេរិក និងគុយបា កំពុងស្ថិតក្នុងភាពតានតឹងបំផុតក្នុងរយៈពេលជាច្រើនទសវត្សរ៍មកនេះ ដោយរដ្ឋបាលលោក ត្រាំ បានកាត់ផ្តាច់ការផ្ទេរប្រាក់ទៅគុយបា គំរាមដាក់ពន្ធលើប្រទេសណាដែលផ្គត់ផ្គង់ប្រេងដល់គុយបា និងបានដាក់ប្រទេសនេះក្នុងបញ្ជី «រដ្ឋឧបត្ថម្ភភេរវកម្ម»។ ក្នុងដំណើរទស្សនកិច្ចនេះ សមាជិកសភាទាំងពីររូបបានសម្តែងក្តីសោកសង្រេងជាខ្លាំង ក្រោយចុះពិនិត្យមន្ទីរពេទ្យសម្រាកព្យាបាលជំងឺមហារីក និងផ្នែកសម្ភពមួយចំនួននៅទីក្រុងឡាហាវ៉ាណា ដែលកំពុងជួបវិបត្តិយ៉ាងធ្ងន់ធ្ងរ ដោយសារតែការខ្វះខាតប្រេងឥន្ធនៈ និងថ្នាំពេទ្យ ដែលពួកគេចាត់ទុកថាជាផលវិបាកដោយផ្ទាល់ពីការបិទខ្ទប់របស់លោក ត្រាំ៕