(សិង្ហបុរី)៖ ការស្ទង់មតិប្រចាំឆ្នាំដោយវិទ្យាស្ថានស្រាវជ្រាវសិង្ហបុរី បានរកឃើញថា នៅទូទាំងតំបន់អាស៉ីអាគ្នេយ៍ មតិភាគច្រើន ប៉ុន្តែមិនដាច់ឆ្ងាយប៉ុន្មាននោះទេ បាននិយាយថា នឹងឈរនៅខាងចិនជាជាងសហរដ្ឋអាមេរិក ប្រសិនបើត្រូវបង្ខំឱ្យរើសយកខាងណាមួយ។ នេះបើតាមការចេញផ្សាយដោយ ទីភ្នាក់ងារព័ត៌មាន CNA នាថ្ងៃអង្គារ ទី៧ ខែមេសា ឆ្នាំ២០២៦។

របាយការណ៍ស្តីពីស្ថានភាពអាស៉ីអាគ្នេយ៍ឆ្នាំ២០២៦ របស់វិទ្យាស្ថាន ISEAS-Yusof Ishak បានបង្ហាញថា អ្នកចូលរួមស្ទង់មតិ​សរុប៥២ភាគរយ បានជ្រើសរើសយកចិន ធៀបនឹង៤៨ភាគរយ ដែលបានរើសយកអាមេរិក។ លទ្ធផលថ្មីចុងក្រោយនេះ ដាក់ចិន​មកនៅខាងមុខសាជាថ្មី បន្ទាប់ពីបាននៅក្រោយទីក្រុងវ៉ាស៉ីនតោន ចាប់ពីឆ្នាំ២០២០ ដល់ឆ្នាំ២០២៣ និងម្តងទៀតនៅឆ្នាំ២០២៥ ជាមួយអត្រា៤៧.៧ភាគរយ។ ចិនបានដណ្តើមការនាំមុខមួយភ្លែត កាលពីឆ្នាំ២០២៤ ជាមួយអត្រា៥០.៥ភាគរយ។

ការស្ទង់មតិឆ្នាំនេះ ត្រូវបានធ្វើឡើងកាលពីចន្លោះថ្ងៃទី៥ ខែមករា ដល់ថ្ងៃទី២០ ខែកុម្ភៈ ដោយមានអ្នកចូលរួមសរុប២០០៨នាក់ មកពីសមាជិកអាស៊ានទាំង១១ប្រទេស។ សមាសភាពអ្នកចូលរួមទាំងនោះ គឺមានចាប់តាំងពីអ្នកស្រាវជ្រាវ, អ្នកតំណាងប្រព័ន្ធផ្សព្វផ្សាយ, អង្គការ NGO រហូតដល់មន្រ្តីរដ្ឋាភិបាល, អ្នកតំណាងវិស័យឯកជន និងសង្គមស៉ីវិល។

គួរបញ្ជាក់ថា សំឡេងគាំទ្រចិន ត្រូវបានកត់សម្គាល់ឃើញថា មានភាពរឹងមាំជាពិសេស នៅក្នុងប្រទេសឥណ្ឌូណេស៉ី (៨០.១ភាគរយ), ម៉ាឡេស៉ី (៦៨ភាគរយ), សិង្ហបុរី (៦៦.៣ភាគរយ), ទីម័រខាងកើត (៥៨.២ភាគរយ), ថៃ (៥៥ភាគរយ) និងព្រុយណេ (៥៣.៥ភាគរយ)។ ផ្ទុយទៅវិញ សំឡេងគាំទ្រសហរដ្ឋអាមេរិក បន្តមានភាពរឹងមាំនៅប្រទេសហ្វីលីពីន (៧៦.៨ភាគរយ), មីយ៉ាន់ម៉ា (៦១.៤ភាគរយ), កម្ពុជា (៦១ភាគរយ) និងវៀតណាម (៥៩.២ភាគរយ)។ សម្រាប់នៅប្រទេសឡាវ គឺគេមើលឃើញសំឡេងគាំទ្ររវាងមហាអំណាចទាំងពីរ ស្ទើរ៥០ភាគរយស្មើគ្នា៕