(ហាណូយ)៖ នាថ្ងៃអង្គារ ទី៧ ខែមេសា សមាជិកសភានៃប្រទេសវៀតណាម បានបោះឆ្នោតជ្រើសតាំង លោក Le Minh Hung ដែលជាអតីតទេសាភិបាលធនាគារកណ្តាល ធ្វើជានាយករដ្ឋមន្រ្តីថ្មី សម្រាប់រយៈពេល៥ឆ្នាំខាងមុខ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Le Minh Hung ដែលមានវ័យ៥៦ឆ្នាំ​ នឹងត្រូវឡើងកាន់តួនាទីជានាយករដ្ឋមន្រ្តីបន្ត ពីនាយករដ្ឋមន្រ្តីចាស់ គឺលោក Pham Minh Chinh ដែលបានកាន់តំណែងនេះ តាំងតែពីឆ្នាំ២០២១មក។ កាលពីឆ្នាំ២០១៦ ដោយមានអាយុត្រឹម៤៦ឆ្នាំ​ លោក Hung បានក្លាយជាទេសាភិបាលវ័យក្មេងជាងគេបង្អស់ ក្នុងប្រវត្តិសាស្រ្តនៃធនាគារកណ្តាលប្រទេសវៀតណាម ហើយរូបលោកបានកាន់តួនាទីនោះ រហូតដល់ឆ្នាំ២០២០។ អំឡុងមហាសន្និបាតបក្សកុម្មុយនីស្តវៀតណាម កាលពីខែមករា ដើមឆ្នាំនេះ លោក Hung ត្រូវបានជ្រើសរើសឱ្យក្លាយជា សមាជិកការិយាល័យនយោបាយ ដែលជាស្ថាប័នកំពូលនៅក្នុងបក្ស។

គួរបញ្ជាក់ថា ក្នុងថ្ងៃអង្គារនេះ សភាវៀតណាម ក៏បានបោះឆ្នោតផងដែរជ្រើសតាំង អគ្គលេខាធិការបក្សកុម្មុយនីស្ត លោក To Lam ជាប្រធានរដ្ឋ ឬប្រធានធិបតីថ្មី សម្រាប់អាណត្តិឆ្នាំ ២០២៦-២០៣១ ពោលគឺរូបលោកកាន់តំណែងកំពូល២ ក្នុងពេលតែមួយតែម្តង ខណៈកាលពីថ្ងៃចន្ទ សភាបានបោះឆ្នោតជ្រើសតាំងលោក Tran Thanh Man បន្តធ្វើជាប្រធានសភា។ អគ្គលេខាធិការបក្ស ប្រធានាធិបតី នាយករដ្ឋមន្រ្តី និងប្រធានសភា គឺជា​សសរស្តម្ភទាំង៤ នៅក្នុងរចនាសម្ព័ន្ធដឹកនាំរួមរបស់ប្រទេសវៀតណាម ទោះជាបែបនេះក្តី ជាក់ស្តែងគឺអគ្គលេខាធិការបក្ស ជាមេដឹកនាំដែលមានអំណាចធំជាងគេបង្អស់៕