(ស៉ីដនី)៖ នាថ្ងៃពុធ ទី៨ ខែមេសា នាយករដ្ឋមន្ត្រីអូស្ត្រាលី លោក Anthony Albanese បានស្វាគមន៍បទឈប់បាញ់នៅក្នុងសង្រ្គាមមជ្ឈិមបូព៌ា ដែលសម្រេចបានរវាងសហរដ្ឋអាមេរិក អ៉ីស្រាអែល និងអ៉ីរ៉ង់ ខណៈរិះគន់វោហារសាស្ត្ររបស់លោកប្រធានាធិបតី ដូណាល់ ត្រាំ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

មុនពេលឈានដល់បទឈប់បាញ់ លោក ត្រាំ បាននិយាយថា «អរិយធម៌ទាំងមូលនឹងត្រូវវិនាស» ប្រសិនបើអ៉ីរ៉ង់ មិនព្រមធ្វើកិច្ចព្រមព្រៀង។ លោក Albanese បានប្រាប់ ​Sky News យ៉ាងដូច្នេះថា «ខ្ញុំមិនគិតថា វាសមរម្យទេសម្រាប់ ការនិយាយពាក្យសម្តី ដូចប្រធានាធិបតីនៃសហរដ្ឋអាមេរិក ហើយខ្ញុំគិតថាវានឹងបង្កើតជាក្តីបារម្ភ»។

គួរបញ្ជាក់ថា លោក Albanese បានគាំទ្រការវាយប្រហាររបស់សហរដ្ឋអាមេរិកលើអ៉ីរ៉ង់ នៅដើមដំបូងនៃសង្រ្គាម ប៉ុន្តែលោកបានសម្តែងការមិនពេញចិត្តអំពីការកើនឡើងនៃជម្លោះ នៅក្នុងប៉ុន្មានសប្តាហ៍ថ្មីៗ៕