(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានទទួលស្វាគមន៍អគ្គលេខាធិការអង្គការណាតូ (NATO) លោក ម៉ាក រូតត៍ (Mark Rutte) នៅឯសេតវិមានកាលពីថ្ងៃពុធ ខណៈដែលសង្គ្រាមជាមួយប្រទេសអ៊ីរ៉ង់ បានរុញច្រានទំនាក់ទំនងរបស់សហរដ្ឋអាមេរិក ជាមួយសមាជិកផ្សេងទៀតនៃសម្ព័ន្ធភាពយោធាមួយនេះឱ្យឈានដល់ចំណុចវិបត្តិ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

គួរបញ្ជាក់ថា​ ប្រធានាធិបតីមកពីគណបក្សសាធារណរដ្ឋរូបនេះ ធ្លាប់បានគំរាមដកខ្លួនចេញពីសម្ព័ន្ធភាពឆ្លងអាត្លង់ទិក ដែលមានសមាជិកចំនួន ៣២ប្រទេសមួយនេះ ហើយកាលពីប៉ុន្មានសប្តាហ៍ថ្មីៗនេះ លោកបានថ្កោលទោសសម្ព័ន្ធមិត្តអឺរ៉ុបរបស់ទីក្រុងវ៉ាស៊ីនតោន ចំពោះអ្វីដែលលោកចាត់ទុកថាជាការគាំទ្រមិនគ្រប់គ្រាន់ សម្រាប់យុទ្ធនាការទម្លាក់គ្រាប់បែករបស់អាមេរិក និងអ៊ីស្រាអែលនៅអ៊ីរ៉ង់។ យ៉ាងណាក្តី លោក ត្រាំ បានថ្លែងកាលពីថ្ងៃអង្គារថា ការវាយប្រហារនឹងត្រូវផ្អាក បន្ទាប់ពីភាគីទាំងពីរបានយល់ព្រមលើបទឈប់បាញ់រយៈពេលពីរសប្តាហ៍៕