(តៃប៉ិ)៖ សមាជិកព្រឹទ្ធសភាអាមេរិក លោក Jim Banks បាននិយាយក្នុងពេលជួបមេដឹកនាំតៃវ៉ាន់ លោក Lai Ching-te នៅទីក្រុងតៃប៉ិ ថាសភាតៃវ៉ាន់ គួរតែអនុម័តកញ្ចប់ថវិកាការពារជាតិពិសេសដែលជាប់គាំង ដើម្បីជាការផ្ញើសារទៅកាន់ទីក្រុងប៉េកាំង និងពិភពលោកថាខ្លួនយកចិត្តទុកដាក់ខ្លាំង ចំពោះសន្តិភាពដែលពឹងផ្អែកលើកម្លាំង។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី៩ ខែមេសា ឆ្នាំ២០២៦។

លោក Lai កាលពីឆ្នាំមុន បានលើកសំណើ ៤០ពាន់លានដុល្លារ បន្ថែមក្នុងការចំណាយវិស័យការពារជាតិ ដើម្បីទប់ទល់ជាមួយចិន។​ កាលណោះ សភាតៃវ៉ាន់ដែលបក្សប្រឆាំងមានសំឡេងភាគច្រើន បានជំទាស់។

យោងតាមវីដេអូនៃជំនួប ដែលផ្តល់ដោយការិយាល័យមេដឹកនាំតៃវ៉ាន់ លោក Banks ដែលជាសមាជិកគណៈកម្មាធិការសេវាប្រដាប់អាវុធព្រឹទ្ធសភា មកពីគណបក្សសាធារណរដ្ឋ បានប្រាប់លោក Lai កាលពីថ្ងៃពុធថា «​សភា​តៃវ៉ាន់​ត្រូវ​អនុវត្ត​តួនាទី​របស់​ខ្លួន និង​អនុម័ត​កញ្ចប់ថវិកា​ពិសេស។ នៅ​ពេល​កញ្ចប់នោះត្រូវបាន​អនុម័ត​ នោះ​គឺជា​សញ្ញា​មួយ​ដល់​ចិន និង​ដល់​ពិភពលោក​ទាំងមូល​ថា តៃវ៉ាន់​ពិតជា​យកចិត្តទុកដាក់​ចំពោះ​សន្តិភាព​ដែលពឹងផ្អែក​កម្លាំងយោធា»។

លោក Banks ត្រូវបានគេស្គាល់ថាជាសមាជិកក្រុមអ្នកតាក់តែងច្បាប់ ៣៧រូបមកនៃគណបក្សទាំងពីរក្នុងព្រឹទ្ធសភាអាមេរិក។ កាលពីខែកុម្ភៈ លោកបានផ្ញើលិខិតឱ្យអ្នកនយោបាយជាន់ខ្ពស់តៃវ៉ាន់ ដោយសម្តែងការព្រួយបារម្ភ អំពីការជាប់គាំងផែនការចំណាយលើវិស័យការពារជាតិ៕