បទវិភាគ៖ ជប៉ុនពន្លឿន «ការធ្វើយោធូបនីយកម្មឡើងវិញ» គឺជាជំហានដ៏មានគ្រោះថ្នាក់មួយទៀត
10-04-2026 17:04
(ប៉េកាំង)៖ ដោយមិនអើពើនឹងការប្រឆាំងយ៉ាងខ្លាំងក្លាទាំងក្នុងនិងក្រៅប្រទេស ជប៉ុនកំពុងពន្លឿន "ការធ្វើយោធូបនីយកម្មឡើងវិញ" ដែលជាជំហានដ៏មានគ្រោះថ្នាក់មួយទៀត។
តាមការផ្សាយដំណឹងរបស់ប្រព័ន្ធផ្សព្វផ្សាយជប៉ុន នាពេលថ្មីៗកន្លងទៅនេះបានឱ្យដឹងថា រដ្ឋាភិបាលជប៉ុនកំពុងគិតពិចារណាពីការដាក់ចេញផែនការដើម្បីបន្ធូរបន្ថយការរឹតត្បិតចំពោះការនាំចេញអាវុធ ដែលខ្លឹមសារទាំងមូលត្រូវបានបញ្ជាក់ឱ្យបានច្បាស់ ហើយគ្រោងនឹងកែសម្រួលគោលការណ៍បី ស្តីពីការផ្ទេរបរិក្ខារការពារជាតិនិងសេចក្តីណែនាំអំពីការប្រើប្រាស់នៅចុងខែនេះ ។ នេះគឺជាទង្វើថ្មីបំផុតរបស់ជប៉ុនក្នុងការស្វែងរក ការលុបចោលទាំងស្រុង នូវការហាមឃាត់ការនាំចេញអាវុធនិងបំបែកការជាប់ដៃជាប់ជើងពីរដ្ឋធម្មនុញ្ញសន្តិភាព ។ ប្រឈមមុខនឹងបម្រែបម្រួលយ៉ាងស៊ីជម្រៅ នៃស្ថានការណ៍ពិភពលោក "យោធានិយមបែបថ្មី" របស់ជប៉ុនបានបង្ហាញពីមុខមាត់ដ៏អាក្រក់ម្តងទៀត ដែលបង្កជាការគំរាមកំហែងជាក់ស្តែងដល់សនិ្តសុខនិងស្ថិរភាពក្នុងតំបន់ ហើយបណ្តាលឱ្យប្រទេសជិតខាង និងសហគមន៍អន្តរជាតិមានការប្រុងប្រយ័ត្នខ្ពស់។
អនុលោមតាមគោលនយោបាយបច្ចុប្បន្ន ការនាំចេញបរិក្ខារការពារជាតិរបស់ជប៉ុន ទៅកាន់ប្រទេសដទៃទៀតត្រូវបានកំណត់ជាគោលការណ៍លើអាវុធ ៥ ប្រភេទដែលអាចប្រើប្រាស់ជាសំខាន់ក្នុងវិស័យភស្តុភារកម្ម ដូចជាការជួយសង្គ្រោះនិងការដឹកជញ្ជូនជាដើម ។ ចាប់តាំងពីលោកស្រី Sanae Takaichi បានចូលកាន់តំណែងកាលពីខែតុលា ឆ្នាំ ២០២៥មក ជប៉ុនបានពន្លឿនការជំរុញការបង្កើនកងទ័ពនិងកម្លាំងយោធា ។ នៅដើមខែកុម្ភៈ ឆ្នាំនេះ ជប៉ុនបានធ្វើការបោះច្នោតជ្រើសរើសនៃសភាតំណាងរាស្រ្ត ហើយពាក្យសន្យាដែលបានធ្វើពេលចូលរួមការបោះឆ្នោតរបស់បក្សសេរីប្រជាធិបតេយ្យក៏បូករួមទាំង "ការបន្ធូរបន្ថយការរឹតត្បិតចំពោះការនាំចេញអាវុធ" ផងដែរ ។
តាមការផ្សាយដំណឹងរបស់ប្រព័ន្ធផ្សព្វផ្សាយជប៉ុនឱ្យដឹងថា ផែនការចុងក្រោយបំផុតដែលរដ្ឋាភិបាលលោកស្រី Sanae Takaichi កំពុងគិតពិចារណា រួមមាន៖ ការលុបចោលការដាក់កំហិតលើការនាំចេញបរិក្ខារការពារជាតិចំនួន ៥ ប្រភេទដែលអាចប្រើប្រាស់ ក្នុងវិស័យមិនមែនប្រយុទ្ធតែប៉ុណ្ណោះ អនុញ្ញាតជាគោការណ៍ឱ្យនាំចេញផលិតផលដែលបូករួមទាំងអាវុធមហាប្រល័យផងដែរ ហើយបានបង្កើតការកំណត់លើកលែង សម្រាប់ការនាំចេញទៅកាន់ប្រទេសដែលស្ថិតក្នុងការប៉ះទង្គិចដែលបន្សល់ទុកលំហរមួយចំនួន សម្រាប់ការនាំចេញនាពេលអនាគត ។ លើសពីនេះទៅទៀត តួនាទីរបស់សភាជប៉ុនកំពុងកើតមានការប្រែប្រូលដែលប្រែក្លាយពី "ការត្រួតពិនិត្យជាមុននិងឃ្លាំមើលក្រោយមក" ឱ្យទៅជាការទទួលយកយ៉ាងអសកម្មនូវ "ការរាយការណ៍ក្រោយមក" ដែលលែងដើរតួនាទីជា "ការជាន់ហ្វ្រាំង" សម្រាប់ការនាំចេញអាវុធ ។ ប្រព័ន្ធផ្សព្វផ្សាយជប៉ុនបានវិភាគថា ប្រសិនបើផែនការនេះត្រូវបានអនុវត្ត នោះគឺមានន័យថា ពួកគេសម្រេចបាននូវ"ភាពរលុងដោយគ្រប់ជ្រុងជ្រោយ"លើការនាំចេញអាវុធ ។ ទាក់ទងនឹងរឿងនេះ សាធារណមតិក្នុងសង្គមជប៉ុនបានសម្តែងការព្រួយបារម្ភយ៉ាងខ្លាំង។
យោងតាមរបៀបវារៈរបស់រដ្ឋាភិបាលជប៉ុនបានឱ្យដឹងថា ក្រៅពីការជំរុញការលុបចោលទាំងស្រុងនូវការហាមឃាត់ការនាំចេញអាវុធ រដ្ឋាភិបាលក៏មានផែនការធ្វើវិសោធនកម្ម "ឯកសារចំនួនបីស្តីពីការការពារសន្តិសុខ" ធ្វើវិសោធនកម្ម "គោលការណ៍ចំនួនបីស្តីពីការគ្មាននុយក្លេអ៊ែរ" និងជំរុញរបៀបវារៈធ្វើវិសោធនកម្មរដ្ឋធម្មនុញ្ញនៅឆ្នាំ ២០២៦ ។ល។ ការពិតជាក់ស្តែងគ្រប់បែបយ៉ាងបានបញ្ជាក់ថា ពួកស្តាំនិយមរបស់ជប៉ុនកំពុងពន្លឿន ការល្មើសនឹងសន្តិនិយមបន្ទាប់ពីសង្គ្រាមលោកលើកទី២។ ហេតុនេះហើយ សហគមន៍អន្តរជាតិបានយល់ដឹងថែមមួយកម្រិតទៀតថា ប្រទេសចិនបានចាត់វិធានការដើម្បីបង្កើនការគ្រប់គ្រងការនាំចេញទំនិញ ដែលអាចប្រើប្រាស់ទាំងវិស័យស៊ីវិលនិងយោធា ចំពោះប្រទេសជប៉ុនតាមផ្លូវច្បាប់ ហើយដាក់បញ្ចូលអង្គភាពរបស់ជប៉ុនចំនួន ២០ ក្នុងបញ្ជីឈ្មោះស្តីពីការគ្រប់គ្រងការនាំចេញនិងដាក់បញ្ចូលអង្គភាពរបស់ជប៉ុនចំនួន ២០ ក្នុងបញ្ជីឈ្មោះផ្តោតសំខាន់ វាគឺមានសារសំខាន់ណាស់ និងជាទង្វើដ៏ចាំបាច់សម្រាប់ទប់ស្កាត់ "ការធ្វើយោធូបនីយកម្មឡើងវិញ" និងការប៉ុនប៉ងមានអាវុធនុយក្លេអ៊ែររបស់ជប៉ុន ក៏ដូចជាគាំពារសន្តិភាពក្នុងតំបន់និងពិភពលោក។
សំដៅចំពោះសកម្មភាពដ៏គឃ្លើនគ្រប់បែបយ៉ាងរបស់ជប៉ុន សហគមន៍អន្តរជាតិចាំបាច់ត្រូវរក្សាការប្រុងប្រយ័ត្នខ្ពស់ និងធ្វើពហិការយ៉ាងដាច់ណាត់ ហើយរួមគ្នាគាំពារសមិទ្ធផលជ័យជម្នះ ក្នុងសង្គ្រាមលោកលើកទីពីរនិងសណ្តាប់ធ្នាប់អន្តរជាតិបន្ទាប់ពីសង្គ្រាមលោកលើកទីពីរ។ បើសិនជាជប៉ុនធ្វើតាមតែទំនើងចិត្តរបស់ខ្លួន មុខជានឹងកាន់តែឆាប់វិនាសជាក់ជាមិនខាន៕
វិទ្យុមិត្តភាពកម្ពុជាចិន
