(ស៊ីដនី)៖ នាយករដ្ឋមន្ត្រីអូស្ត្រាលី លោក អាន់តូនី អាល់បានីស (Anthony Albanese) នឹងបំពេញទស្សនកិច្ចនៅប្រទេសព្រុយណេ និងម៉ាឡេស៊ីនាសប្តាហ៍នេះ ដើម្បីបន្តកិច្ចខិតខំប្រឹងប្រែងផ្នែកការទូតក្នុងការធានាដល់ការផ្គត់ផ្គង់ប្រេងឥន្ធនៈពីសម្ព័ន្ធមិត្តអាស៊ី បន្ទាប់ពីមានការរំខានដោយសារជម្លោះនៅតំបន់មជ្ឈិមបូព៌ា។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

សេចក្តីថ្លែងការណ៍ពីការិយាល័យរបស់លោកបានឱ្យដឹងកាលពីថ្ងៃអាទិត្យថា លោក អាល់បានីស នឹងធ្វើដំណើរទៅកាន់រដ្ឋធានីបានដាសេរីបេហ្គាវ៉ាន់ (Bandar Seri Begawan) និងទីក្រុងគូឡាឡាំពួ (Kuala Lumpur) ចាប់ពីថ្ងៃទី១៤ ដល់ទី១៧ ខែមេសា ដោយគ្រោងនឹងចូលក្រាបបង្គំគាល់ព្រះចៅស៊ុលតង់ព្រុយណេ ហាសាណាល់ បុលគីយ៉ា (Hassanal Bolkiah) និងជួបពិភាក្សាការងារជាមួយនាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim)។ មេដឹកនាំអូស្ត្រាលីរូបនេះបានគូសបញ្ជាក់ថា «ការភ្ជាប់ទំនាក់ទំនងជាមួយដៃគូក្នុងតំបន់ដ៏សំខាន់ដូចជា ព្រុយណេ និងម៉ាឡេស៊ី នឹងជួយធានាបាននូវសន្តិសុខនៃការផ្គត់ផ្គង់ថាមពលដល់អូស្ត្រាលី ក្នុងអំឡុងពេលដែលមានភាពមិនប្រាកដប្រជានេះ»។

គួរបញ្ជាក់ថា អូស្ត្រាលីពឹងផ្អែកលើការនាំចូលប្រេងឥន្ធនៈប្រមាណ ៨០ភាគរយ ដែលបច្ចុប្បន្នម៉ាឡេស៊ីគឺជាប្រភពផ្គត់ផ្គង់ប្រេងចម្រាញ់ធំបំផុតទីបី ខណៈព្រុយណេផ្គត់ផ្គង់ប្រេងម៉ាស៊ូតចំនួន ៩ភាគរយ។ កន្លងមក អូស្ត្រាលីតែងតែជួបប្រទះនូវកង្វះខាត និងការហក់ឡើងនៃតម្លៃប្រេងឥន្ធនៈក្នុងស្រុកយ៉ាងខ្លាំង ចាប់តាំងពីច្រកសមុទ្រដ៏សំខាន់ខាងលើត្រូវបានរាំងខ្ទប់មក៕