(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានបញ្ជាក់ថា លោកបានផ្ញើលិខិតមួយច្បាប់ទៅកាន់ប្រធានាធិបតីចិន លោក ស៊ី ជិនពីង ដោយស្នើសុំកុំឱ្យចិនផ្គត់ផ្គង់អាវុធដល់ប្រទេសអ៊ីរ៉ង់ ខណៈលោក ស៊ី បានឆ្លើយតបវិញថា រដ្ឋាភិបាលទីក្រុងប៉េកាំងមិនបានផ្គត់ផ្គង់សព្វាវុធដល់ទីក្រុងតេអេរ៉ង់នោះឡើយ។ ការលើកឡើងរបស់មេដឹកនាំអាមេរិករូបនេះ ត្រូវបានធ្វើឡើងនៅក្នុងបទសម្ភាសន៍មួយកាលពីថ្ងៃពុធ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការបញ្ជាក់នេះធ្វើឡើងបន្ទាប់ពីលោក ត្រាំ កាលពីសប្តាហ៍មុន បានគំរាមដាក់ទណ្ឌកម្មដំឡើងពន្ធគយ ៥០ភាគរយភ្លាមៗ លើបណ្តាប្រទេសណាដែលផ្គត់ផ្គង់អាវុធដល់ប្រទេសអ៊ីរ៉ង់។ លោក ត្រាំ ក៏បានសង្កត់ធ្ងន់ផងដែរថា លោកមិនរំពឹងថាការប្រែប្រួលនៅក្នុងទីផ្សារប្រេងសកលដោយសារសង្គ្រាមនៅអ៊ីរ៉ង់ នឹងជះឥទ្ធិពលដល់ជំនួបដែលបានគ្រោងទុករបស់លោកជាមួយលោក ស៊ី ជិនពីង នៅខែក្រោយនោះទេ ដោយលោកអះអាងថា «គាត់ (ចិន) គឺជាអ្នកដែលត្រូវការប្រេង ចំណែកឯយើងមិនត្រូវការនោះទេ»។

បន្ថែមពីនេះ តាមរយៈការបង្ហោះសារនៅលើបណ្តាញសង្គម Truth Social លោក ត្រាំ បានអះអាងថា លោកកំពុងតែរៀបចំបើកច្រកសមុទ្រហ័រមូស ជាអចិន្ត្រៃយ៍ឡើងវិញ សម្រាប់ប្រទេសចិន និងពិភពលោក។ ទោះជាយ៉ាងណាក្តី ការអះអាងនេះហាក់នៅមានភាពស្រពិចស្រពិលនៅឡើយ ខណៈដែលការធ្វើនាវាចរណ៍ឆ្លងកាត់ច្រកសមុទ្រដ៏សំខាន់នេះ នៅតែបន្តប្រឈមនឹងការរឹតត្បិត បើទោះបីជាមានបទឈប់បាញ់រយៈពេលពីរសប្តាហ៍កំពុងអនុវត្តក៏ដោយ។ ម្យ៉ាងវិញទៀត យោធាអាមេរិកក៏បាននឹងកំពុងអនុវត្តការបិទខ្ទប់ការធ្វើពាណិជ្ជកម្មតាមផ្លូវសមុទ្រចេញចូលកំពង់ផែអ៊ីរ៉ង់ផងដែរ៕