(ស៉ីដនី)៖ នៅថ្ងៃព្រហស្បតិ៍ ទី១៦ ខែមេសា មន្ត្រីរដ្ឋាភិបាល និងតំណាងក្រុមហ៊ុនបានឱ្យដឹងថា អគ្គីភ័យនៅរោងចក្រចម្រាញ់ប្រេងដ៏ធំទីពីររបស់អូស្ត្រាលី បានប៉ះពាល់ដល់ការផលិតប្រេងសាំង នៅពេលដែលប្រទេសនេះកំពុងប្រឈមសម្ពាធដេីម្បីធានាសន្តិសុខឥន្ធនៈ ខណៈសង្រ្គាមអ៉ីរ៉ង់រំខានដល់ការផ្គត់ផ្គង់ប្រេងជាសកល។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters។

អាជ្ញាធរអគ្គីភ័យរដ្ឋនិយាយថា ភ្លេីងដែលឆាបឆេះរោងចក្រចម្រាញ់ប្រេងបាន ១២០ ០០០បារ៉ែលក្នុងមួយថ្ងៃ គ្រប់គ្រងដោយក្រុមហ៊ុន Viva Energy កាលពីថ្ងៃពុធ ទេីបតែអាចគ្រប់គ្រងបាននៅវេលារសៀលថ្ងៃព្រហស្បតិ៍នេះ។ វាបានកើតឡើងចំពេលដ៏អាក្រក់សម្រាប់អូស្ត្រាលី ដែលពឹងផ្អែកលើការនាំចូល ៨០ភាគរយនៃតម្រូវការប្រេងឥន្ធនៈរបស់ខ្លួន ហើយកំពុងប្រជែងរកប្រភពផ្គត់ផ្គង់។

រដ្ឋមន្រ្តីក្រសួងថាមពលអូស្រ្តាលី លោក Chris Bowen និយាយថានេះមិនមែនជារឿងល្អទេ ជាក់ស្តែងទៅមុខទៀតយេីងនឹងដឹងថាតើមានផលប៉ះពាល់កម្រិតណា។

រោងចក្រចម្រាញ់ប្រេងរបស់ក្រុមហ៊ុន Viva Energy ផ្គត់ផ្គង់ជាងពាក់កណ្តាលនៃឥន្ធនៈនៅក្នុងរដ្ឋដែលមានប្រជាជនច្រើនជាងគេទីពីររបស់អូស្ត្រាលីគឺ Victoria និងមួយភាគដប់នៃតម្រូវការសរុបរបស់ប្រទេស។ បេីតាមក្រុមហ៊ុន ទិន្នផលប្រេងសាំង និងសាំងយន្តហោះ នឹងរងផលប៉ះពាល់ ប៉ុន្តែអាចបំពេញតម្រូវការបានពីការនាំចូល។

គួរបញ្ជាក់ថា វិស័យប្រេងពិភពលោក ត្រូវបានរំខានដោយសង្រ្គាមនៅតំបន់មជ្ឈិមបូព៌ា។ ទោះជាសង្រ្គាមបានផ្អាក ប៉ុន្តែតម្លៃប្រេងនៅបន្តស្ថិតក្នុងកម្រិតខ្ពស់ ៕