ធុរជនតៃវ៉ាន់ ចង់ឱ្យទីក្រុងប៉េកាំង និងតៃប៉ិ កុំយកនយោបាយ មកលាយឡំនឹងពាណិជ្ជកម្ម (Video inside)
20-04-2026 16:27
(តៃប៉ិ)៖ ប្រធានក្រុមអ្នកធុរកិច្ចកំពូលមួយរបស់តៃវ៉ាន់ បាននិយាយថា ទាំងទីក្រុងប៉េកាំង និងតៃប៉ិ គួរតែទុកនយោបាយ ឱ្យដាច់ដោយឡែកពីការផ្លាស់ប្ដូរពាណិជ្ជកម្ម និងទេសចរណ៍ បន្ទាប់ពីចិនបង្ហាញពីការលើកទឹកចិត្តថ្មីសម្រាប់កោះតៃវ៉ាន់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី២០ ខែមេសា ឆ្នាំ២០២៦។
លោក Paul Hsu ប្រធានសភាពាណិជ្ជកម្មចិនក្នុងកោះតៃវ៉ាន់ បានលើកឡើងថា «ដរាបណាមានការបើកចំហ វាគួរតែធ្វើឱ្យមានលក្ខណៈជាប្រព័ន្ធ និងមានលក្ខណៈធម្មតាតាមដែលអាចធ្វើទៅបាន ដើម្បីរក្សាស្ថិរភាពរយៈពេលវែងនៃការផ្លាស់ប្តូរអាជីវកម្ម និងពាណិជ្ជកម្ម»។
នៅទីក្រុងតៃប៉ិ អមដោយតំណាងមកពីវិស័យទេសចរណ៍ និងម្ហូបអាហារ លោក Hsu បានជំរុញឱ្យចិនធានាស្ថិរភាព ក្នុងទំនាក់ទំនងពាណិជ្ជកម្ម ជាជាងចង់បិទ ឬបើកស្រេចតែចិត្ត។ ក្រុមធុរកិច្ចរបស់លោក Hsu ដែលតំណាងឱ្យជាងមួយលានក្រុមហ៊ុន បានចេញសេចក្តីថ្លែងការណ៍ថា រដ្ឋតៃវ៉ាន់ក៏គួរតែផ្តល់នូវការបើកចំហដល់ចិនផងដែរ។
ជុំវិញការអំពាវនាវនេះ ការិយាល័យកិច្ចការតៃវ៉ាន់របស់ចិន មិនទាន់ឆ្លើយតបភ្លាមៗចំពោះសំណើសុំការអត្ថាធិប្បាយទេ៕
