(ឡាហាវ៉ាន)៖ នៅក្នុងខែនេះ ក្រុមមន្ត្រីអាមេរិក និងគុយបា បានជួបប្រជុំនៅរដ្ឋធានីឡាហាវ៉ានរបស់គុយបា ដោយទីក្រុងវ៉ាស៊ីនតោន បានជំរុញឱ្យរដ្ឋាភិបាលគុយបា ដឹកនាំការធ្វើកំណែទម្រង់សេដ្ឋកិច្ច ចំពោះមុខវិបត្តិថាមពល និងការបិទខ្ទប់ពីអាមេរិកទៅលើលំហូរប្រេង ចូលទៅកាន់ប្រទេសដីកោះមួយនេះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី២១ ខែមេសា ឆ្នាំ២០២៦។

មន្ត្រីក្រសួងការបរទេសអាមេរិក បានបញ្ជាក់ថា កិច្ចប្រជុំធ្វើឡើងកាលពីថ្ងៃទី១០ ខែមេសា សម្រាប់កិច្ចពិភាក្សាដែលត្រួតពិនិត្យដោយរដ្ឋមន្រ្តី Marco Rubio តែមិនបានលម្អិតទេថាមានមន្ត្រីណាខ្លះចូលរួម។ កិច្ចប្រជុំនេះត្រូវបានរាយការណ៍ដំបូងដោយកាសែតអាមេរិក Axios។

មន្ត្រីដដែលបាននិយាយក្នុងលក្ខខណ្ឌមិនបញ្ចេញឈ្មោះទៀតថា គណៈប្រតិភូអាមរិកបានរំលឹកឡើងវិញថា សេដ្ឋកិច្ចគុយបាស្ថិតក្នុងការដួលរលំ ហើយឥស្សរជនកំពុងកាន់អំណាចគុយបា នៅសល់តែចន្លោះតូចមួយប៉ុណ្ណោះ ដើម្បីធ្វើកំណែទម្រង់សំខាន់ៗ ដែលគាំទ្រដោយសហរដ្ឋអាមេរិក មុនពេលកាលៈទេសៈរឹតតែអាក្រក់។

បើតាមលោក Alejandro Garcia del Toro ដែលជាមន្រ្តីទទួលបន្ទុកកិច្ចការអាមេរិកក្នុងក្រសួងការបរទេសគុយបា គ្មានភាគីទាំងពីរណាមួយដាក់ឱសានវាទ ឬធ្វើសេចក្តីគំរាមកំហែងទេនៅក្នុងកិច្ចប្រជុំនេះ ដោយបានលោកពិពណ៌នាថា «មានគោរពគ្នា»៕