(ហុងកុង)៖ ប្រទេសចិន បានដាក់ចេញនូវគម្រោងថ្មីមួយ ដោយជំរុញឱ្យទីក្រុងនានាបញ្ចូលគំនិតបែបយុវវ័យ ទៅក្នុងការរៀបចំផែនការទីក្រុង លំនៅដ្ឋាន សេវាថែទាំសុខភាព អប់រំ និងសាធារណៈ ដើម្បីធ្វើឱ្យជីវភាពរស់នៅក្នុងទីក្រុង កាន់តែស័ក្តិសមនឹងយុវវ័យ កុមារ និងគ្រួសាររបស់ពួកគេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃពុធ ទី២២ ខែមេសា ឆ្នាំ២០២៦។

គម្រោងនេះត្រូវបានស្នើឡើង បន្ទាប់ពីទីក្រុងប៉េកាំង ប្តេជ្ញាកសាងសង្គមដ៏ស័ក្តិសមសម្រាប់ការមានកូន ពីឆ្នាំ២០២៦-២០៣០។ ប្លង់មេដែលចេញរួមគ្នាដោយនាយកដ្ឋានចំនួន ១៥ មានបំណងធ្វើឱ្យកាន់តែស៉ីជម្រៅនូវរបៀបសាងសង់ «ទីក្រុងដែលផ្តោតលើតម្រូវការរបស់យុវជន» ជាមួយវិធានការនានា ដែលសំដៅលើការងារ លំនៅដ្ឋាន ការថែទាំសុខភាព ការជួយឧបត្ថម្ភ និងសេវាកម្មទីក្រុង។

វិធានការនានា រួមមានការកែរបៀបផ្គូផ្គងរកគូស្រករ និងសេវាសង្គម ពង្រីកការផ្តល់ឧបត្ថម្ភធនលើការថែទាំកុមារ ការរៀបចំបន្ទប់សម្រាលសម្រាប់ម្តាយ និងទារកឱ្យកាន់តែប្រសើរ កែលម្អការសេវាសម្ភព និងកុមារ ពង្រឹងសេវាថែទាំកុមារពេលចេញពីរៀន និងក្នុងថ្ងៃឈប់សម្រាក ក៏ដូជាការធ្វើឱ្យលទ្ធភាពចូលរៀនសម្រាប់កូន របស់ពលករចំណាកស្រុក កាន់តែមានលក្ខណៈស្មើភាពគ្នា។

គោលនយោបាយនេះរំពឹងថា នៅឆ្នាំ២០៣០ ទីក្រុងដែលផ្តោតលើតម្រូវការរបស់យុវជន នឹងត្រូវបានអនុវត្តយ៉ាងទូលំទូលាយ ដោយបន្ថែមថានៅឆ្នាំ២០៣៥ ចិនមានបំណងបង្កើតបរិយាកាសដែលមានលក្ខណៈចាស់ទុំ និងពេញលេញសម្រាប់ការអភិវឌ្ឍយុវជន៕