(ប៉េកាំង)៖ ប្រទេសចិនកាលពីថ្ងៃពុធ បានចេញមុខព្រមានថា ស្ថានការណ៍នៅក្នុងតំបន់មជ្ឈិមបូព៌ាកំពុងស្ថិតក្នុង «ចំណុចរបត់ដ៏សំខាន់» បន្ទាប់ពីប្រធានាធិបតីអាមេរិក លោក ដូណាល់ ត្រាំ បានសម្រេចពន្យារបទឈប់បាញ់ ដើម្បីទុកពេលបន្ថែមឱ្យអ៊ីរ៉ង់ធ្វើការចរចា។ នេះបើតាមការចេញផ្សាយ ដោយសារព័ត៌មានអន្តរជាតិ។

ការលើកឡើងរបស់ទីក្រុងប៉េកាំង ធ្វើឡើងបន្ទាប់ពីលោក ត្រាំ បានប្រកាសពន្យារពេលបទឈប់បាញ់រយៈពេលពីរសប្តាហ៍ដែលជិតផុតកំណត់ទៅមុខទៀតដោយមិនកំណត់កាលបរិច្ឆេទ ខណៈភាគីអ៊ីរ៉ង់មិនទាន់មានការឆ្លើយតបជាផ្លូវការនៅឡើយ។ ទោះជាយ៉ាងណា លោក ត្រាំ បានសង្កត់ធ្ងន់ថា វិធានការបិទខ្ទប់កំពង់ផែរបស់អ៊ីរ៉ង់ពីសំណាក់កងទ័ពអាមេរិក នឹងនៅតែបន្តអនុវត្តដដែល។

អ្នកនាំពាក្យក្រសួងការបរទេសចិន លោក ហ្គៅ ជៀគុន (Guo Jiakun) បានថ្លែងនៅក្នុងសន្និសីទសារព័ត៌មានថា៖ «ស្ថានភាពក្នុងតំបន់នាពេលបច្ចុប្បន្ន កំពុងស្ថិតនៅចំណុចរបត់ដ៏សំខាន់ដែលឈរនៅចន្លោះសង្គ្រាម និងសន្តិភាព។ អាទិភាពចម្បងបំផុតនៅពេលនេះ គឺការប្រឹងប្រែងឱ្យអស់ពីលទ្ធភាព ដើម្បីទប់ស្កាត់កុំឱ្យអំពើហិង្សាផ្ទុះឡើងវិញ»។ លោកបានបន្ថែមថា ចិននឹងបន្តដើរតួនាទីយ៉ាង «ស្ថាបនា» ក្នុងការដោះស្រាយវិបត្តិនេះឱ្យបានឆាប់រហ័ស៕​