(ព្រុចសែល)៖ សហភាពអឺរ៉ុប (EU) កំពុងពិចារណាលើការដាក់ចេញនូវវិធានការតម្រូវឱ្យបណ្តាប្រទេសជាសមាជិក រក្សាទុកស្ដុកប្រេងយន្តហោះ និងអាចឈានដល់ការបែងចែកប្រេងទាំងនោះឡើងវិញតាមតម្រូវការជាក់ស្តែង ប្រសិនបើមានកង្វះខាតកើតឡើង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ស្នងការអឺរ៉ុបទទួលបន្ទុកគោលនយោបាយថាមពល លោក ដាន ចូហ្គេនសិន (Dan Jorgensen) បានបង្ហើបឱ្យដឹងកាលពីថ្ងៃពុធថា គណៈកម្មការអឺរ៉ុបបានស្នើឱ្យមានការត្រួតពិនិត្យទិន្នផលនៃរោងចក្រចម្រាញ់ប្រេងនៅទូទាំងសហភាពអឺរ៉ុប ដើម្បីបង្កើនសមត្ថភាពផ្គត់ផ្គង់ឱ្យបានជាអតិបរមា ចំពេលមានការរំខានដោយសារសង្គ្រាមរវាងអាមេរិក-អ៊ីស្រាអែល និងអ៊ីរ៉ង់។ លោកបានបញ្ជាក់ថា EU អាចនឹងបង្កើតច្បាប់ថ្មីលើការរក្សាបម្រុងប្រេងយន្តហោះ និងយន្តការចែកចាយរួមគ្នា ដែលនេះជាវិធានការពិសេសមិនធ្លាប់មានពីមុនមក។

លោក ចូហ្គេនសិន បានសង្កត់ធ្ងន់ថា​ «ជាធម្មតា យើងទុកឱ្យទីផ្សារជាអ្នកសម្រេច ប៉ុន្តែយើងអាចនឹងធ្លាក់ចូលទៅក្នុងវិបត្តិ ដែលសន្តិសុខនៃការផ្គត់ផ្គង់គឺជាបញ្ហាចម្បង មិនមែនត្រឹមតែរឿងតម្លៃនោះទេ»។ វិធានការដែលត្រៀមនឹងដាក់ចេញនេះ ធ្វើឡើងក្នុងគោលបំណងឆ្លើយតបទៅនឹងផលប៉ះពាល់ផ្នែកថាមពល ដែលកំពុងតែគំរាមកំហែងដល់ស្ថិរភាពសេដ្ឋកិច្ច និងវិស័យដឹកជញ្ជូនតាមផ្លូវអាកាសនៅទូទាំងពិភពលោក៕​