(វ៉ាស៉ីនតោន)៖ កាលពីថ្ងៃពុធ ទី២២ ខែមេសា សហរដ្ឋអាមេរិក បានរិះគន់នូវអ្វីដែលខ្លួនហៅថា «យុទ្ធនាការសម្លុតគំរាម» បន្ទាប់ពី​ប្រទេសអាហ្រ្វិកមួយចំនួន ត្រូវបានរាយការណ៍ថា ទទួលរងសម្ពាធពីចិន ដើម្បីបំផ្លាញគម្រោងទស្សនកិច្ចរបស់មេដឹកនាំតៃវ៉ាន់ លោក Lai Ching-te។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

កាលពីថ្ងៃអង្គារ កោះតៃវ៉ាន់បានប្រកាសថា លោក Lai សម្រេចផ្អាកគម្រោងទស្សនកិច្ចទៅកាន់ប្រទេសអេស្វាទីនី ដែលជាសម្ព័ន្ធមិត្តតែ ១គត់​របស់តៃវ៉ាន់នៅទ្វីបអាហ្រ្វិក បន្ទាប់ពីប្រទេសអាហ្រ្វិក៣ផ្សេងទៀត រួមមាន Seychelles, Mauritius និង Madagascar សុខៗស្រាប់តែលុបចោលការអនុញ្ញាតឱ្យយន្តហោះរបស់លោក ហោះធ្វើដំណើរឆ្លងកាត់ដែនអាកាសរបស់ពួកគេ។ កាលពីថ្ងៃពុធ ទីក្រុងប៉េកាំង បាននិយាយថា ខ្លួនវាយតម្លៃខ្ពស់ចំពោះបណ្តាប្រទេសអាហ្វ្រិក ដែលបានលុបចោលការផ្តល់សិទ្ធិហោះហើរ សម្រាប់ទស្សនកិច្ចរបស់លោក Lai ដែលគ្រោងធ្វើឡើងក្នុងសប្តាហ៍នេះ។

អ្នកនាំពាក្យក្រសួងការបរទេសអាមេរិក បានចេញសេចក្តីថ្លែងការណ៍ថា «យើងព្រួយបារម្ភជុំវិញសេចក្តីរាយការណ៍ដែលថា ប្រទេសមួយចំនួន បានលុបចោលការផ្តល់សិទ្ធិហោះហើរឆ្លងកាត់ ដើម្បីរារាំងមិនឱ្យមេដឹកនាំតៃវ៉ាន់ ធ្វើទស្សនកិច្ចទៅកាន់អេស្វាទីនី។ ប្រទេសទាំងនោះ កំពុងធ្វើសកម្មភាពតាមការបង្គាប់បញ្ជារបស់ចិន ដោយលូកលាន់ក្នុង​សុវត្ថិភាព ក៏ដូចជាសេចក្តីថ្លៃថ្នូរ នៃការធ្វើដំណើរជាទូទៅរបស់ក្រុមមន្រ្តីតៃវ៉ាន់។ នេះគឺជាករណីមួយទៀតហើយ នៃការធ្វើយុទ្ធនាការសម្លុតគំរាមរបស់ទីក្រុងប៉េកាំង ប្រឆាំងតៃវ៉ាន់និងក្រុមអ្នកគាំទ្រតៃវ៉ាន់ នៅជុំវិញពិភពលោក»។

គួរបញ្ជាក់ថា អេស្វាទីនី ដែលជាកូនប្រទេសតូចមួយនៅភាគខាងត្បូងទ្វីបអាហ្រ្វិក ស្ថិតក្នុងចំណោមប្រទេសត្រឹម១២ប៉ុណ្ណោះនៅលើពិភពលោក ដែលបន្តរក្សាទំនាក់ទំនងផ្លូវការ ជាមួយកោះតៃវ៉ាន់។ ព្រះមហាក្សត្រអេស្វាទីនី ព្រះអង្គ Mswati បានយាងបំពេញទស្សនកិច្ចទៅកាន់តៃវ៉ាន់ ដើម្បីចូលរួមពិធីស្បថឡើងកាន់តំណែង របស់លោក Lai កាលពីឆ្នាំ២០២៤។ លើកចុងក្រោយ ដែលមេដឹកនាំតៃវ៉ាន់ បានទៅបំពេញទស្សនកិច្ចនៅអេស្វាទីនី គឺកាលពីឆ្នាំ២០២៣ នៅពេលអតីតមេដឹកនាំ លោកស្រី Tsai Ing-wen បានធ្វើដំណើរទៅកាន់ប្រទេសអាហ្រ្វិកមួយនេះ ដែលគ្មានព្រំដែនជាប់សមុទ្រ និងមានប្រជាជនប្រមាណ១.៣លាននាក់៕