(មូស្គូ)៖ ទស្សនាវដ្តី Forbes បានរាយការណ៍ថា ក្រុមមហាសេដ្ឋីរុស្ស៉ី បានកើនឡើងទ្រព្យសម្បត្តិសរុប១១ភាគរយ ដល់ចំនួនកំណត់ត្រាថ្មីមួយ គឺ៦៩៥.៥ពាន់លានដុល្លារ អំឡុងរយៈពេលមួយឆ្នាំកន្លងទៅនេះ បើទោះបីជាបន្តប្រឈមនឹងសង្រ្គាមនៅអ៊ុយក្រែន រួមជាមួយការដាក់ទណ្ឌកម្មធ្ងន់មិនធ្លាប់មានពីលោកខាងលិចក៏ដោយ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃព្រហស្បតិ៍ ទី២៣ ខែមេសា ឆ្នាំ២០២៦។

ក្រុមមហាសេដ្ឋីរុស្ស៉ី សុទ្ធតែមានទំនាក់ទំនងជាមួយធនធានធម្មជាតិដ៏ច្រើនសម្បើម ដែលប្រទេសរុស្ស៉ីបាននាំចេញទៅទីផ្សារសកល ​អស់រយៈពេលរាប់ទសវត្សរ៍ ហើយទ្រព្យសម្បត្តិរបស់ពួកគេ បានកើនឡើង ខណៈដែលផលរំខានចំពោះលំហូរពាណិជ្ជកម្ម បានធ្វើឱ្យទំនិញឡើងថ្លៃ ប៉ុន្តែទស្សនាវដ្តី Forbes បានកត់សម្គាល់ថា ពុំមានឈ្មោះថ្មីលេចឡើងនៅលំដាប់កំពូលនៃបញ្ជីនោះទេ។

បើតាមចំណាត់ថ្នាក់របស់ Forbes លោក Alexei Mordashov អគ្គនាយកក្រុមហ៊ុនវិនិយោគ Severgroup គឺជាកំពូលមហាសេដ្ឋីលេខ១របស់រុស្ស៉ី ជាមួយទ្រព្យសម្បត្តិ៣៧ពាន់លានដុល្លារ ដែលជាកំណើន៨.៤ពាន់លានដុល្លារ ធៀបនឹងឆ្នាំមុន។

រីឯលោក Vladimir Potanin ស្ថាបនិកសម្ព័ន្ធក្រុមហ៊ុន Interros និងក្រុមហ៊ុនផលិតលោហៈ Nornickel ជាប់ចំណាត់ថ្នាក់​លេខ២ ជាមួយទ្រព្យសម្បត្តិ២៩.៧ពាន់លានដុល្លារ។ ដោយឡែក លោក Vagit Alekperov អតីតប្រធានក្រុមហ៊ុនប្រេង Lukoil ស្ថិតនៅចំណាត់ថ្នាក់លេខ៣ ដោយមានទ្រព្យសម្បត្តិ២៩.៥ពាន់លានដុល្លារ ហើយលោក Leonid Mikhelson នាយកប្រតិបត្តិការក្រុមហ៊ុន Novatek និងគ្រួសាររបស់លោក ឈរនៅលេខរៀងទី៤ ជាមួយទ្រព្យសម្បត្តិ២៨.៣ពាន់លានដុល្លារ។

គួរបញ្ជាក់ថា ទំហំទ្រព្យសម្បត្តិរបស់មហាសេដ្ឋីរុស្ស៉ី គឺជាទំហំដ៏តូចមួយបើធៀបទៅនឹងទ្រព្យសម្បត្តិរបស់ក្រុមមហាសេដ្ឋីអាមេរិក ជាពិសេសមហាសេដ្ឋីបច្ចេកវិទ្យា។ តួយ៉ាង លោក Elon Musk ជាប់ចំណាត់ថ្នាក់ជាកំពូលមហាសេដ្ឋកិច្ចមានជាងគេបំផុត​នៅលើពិភពលោកក្នុងបញ្ជី Forbes ជាមួយទ្រព្យសម្បត្តិរហូតដល់៨៣៩ពាន់លានដុល្លារ ខណលោក Larry Page នៃក្រុមហ៊ុន Google ស្ថិតនៅចំណាត់ទី២ ជាមួយទ្រព្យសម្បត្តិ២៥៧ពាន់លានដុល្លារ៕