(ជេដដា)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី នាថ្ងៃសុក្រនេះ បានធ្វើដំណើរទៅដល់ទីក្រុងជេដដា ក្នុងដំណើរទស្សនកិច្ចលើកទីពីរទៅកាន់ប្រទេសអារ៉ាប៊ីសាអូឌីតក្នុងរយៈពេលមួយខែ ដើម្បីពង្រឹងកិច្ចសហប្រតិបត្តិការសន្តិសុខ និងថាមពល ចំពេលមានសង្គ្រាមនៅអ៊ីរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

តាមរយៈសារនៅលើបណ្តាញសង្គម X មេដឹកនាំអ៊ុយក្រែនរូបនេះបានបញ្ជាក់ថា លោកមានគម្រោងជួបពិភាក្សាជាមួយព្រះអង្គម្ចាស់រជ្ជទាយាទ មហាម៉ាត់ ប៊ីន សាល់ម៉ាន ដើម្បីជំរុញកិច្ចព្រមព្រៀងលើវិស័យសន្តិសុខ ថាមពល និងហេដ្ឋារច

នាសម្ព័ន្ធ។ លោក ហ្សេឡេនស្គី បានលើកឡើងថា បន្ទាប់ពីទទួលបានការធានាផ្នែកហិរញ្ញវត្ថុពីមេដឹកនាំអឺរ៉ុបកាលពីថ្ងៃព្រហស្បតិ៍ អ៊ុយក្រែនកំពុងបន្តពង្រីកទំនាក់ទំនងជាមួយអារ៉ាប៊ីសាអូឌីតឱ្យកាន់តែស៊ីជម្រៅបន្ថែមទៀត។

ក្នុងដំណើរទស្សនកិច្ចនេះ អ៊ុយក្រែនក៏មានបំណងផ្សព្វផ្សាយនូវបច្ចេកវិទ្យាយោធារបស់ខ្លួន ជាពិសេសបទពិសោធន៍ក្នុងការកម្ទេចយន្តហោះដ្រូនវាយប្រហាររបស់អ៊ីរ៉ង់ ដែលទីក្រុងកៀវធ្លាប់បានប្រើប្រាស់ប្រកបដោយប្រសិទ្ធភាពក្នុងសង្គ្រាមជាមួយរុស្ស៊ី។ ក្រៅពីនេះ លោក ហ្សេឡេនស្គី ក៏បានផ្តល់ការគាំទ្រផ្នែកជំនាញបច្ចេកទេសរបស់អ៊ុយក្រែន ដើម្បីជួយក្នុងកិច្ចប្រឹងប្រែងស្តារសេរីភាពនាវាចរណ៍នៅច្រកសមុទ្រហ័រមូសឡើងវិញផងដែរ៕