(បរទេស)៖ ក្រសួងការបរទេសសហរដ្ឋអាមេរិក បានបង្កឱ្យមានការភ្ញាក់ផ្អើលយ៉ាងខ្លាំងនៅក្នុងពិភពបច្ចេកវិទ្យា ដោយបានចេញបញ្ជាឱ្យមាន ការព្រមានជាសកល ពាក់ព័ន្ធនឹងការចោទប្រកាន់ថា ក្រុមហ៊ុនបញ្ញាសិប្បនិម្មិតចិន DeepSeek បានចូលរួមក្នុងសកម្មភាពលួចបច្ចេកវិទ្យា AI ខ្នាតធំ។ យោងតាមការចេញផ្សាយដោយទីភ្នាក់ងារសារព័ត៌មាន Reuters កាលពីថ្ងៃទី២៤ ខែមេសា ឆ្នាំ២០២៦ ទីក្រុងវ៉ាស៊ីនតោនបានបង្ហាញក្ដីបារម្ភយ៉ាងខ្លាំងចំពោះសន្តិសុខជាតិ និងកម្មសិទ្ធិបញ្ញាដែលកំពុងរងការគំរាមកំហែង។

នៅក្នុងរបាយការណ៍ដែលផ្ញើទៅកាន់ស្ថានទូតអាមេរិកនៅទូទាំងពិភពលោក ក្រសួងការបរទេសបានលើកឡើងថា DeepSeek ដែលជាក្រុមហ៊ុន AI កំពុងមានសន្ទុះខ្លាំងរបស់ចិន បានប្រើប្រាស់វិធីសាស្ត្រមិនត្រឹមត្រូវក្នុងការទាញយកទិន្នន័យ និងកូដសំខាន់ៗពីក្រុមហ៊ុនបច្ចេកវិទ្យាឈានមុខរបស់អាមេរិក។ ការចោទប្រកាន់នេះបានបញ្ជាក់ថា DeepSeek មិនត្រឹមតែលួចចម្លងគំរូនៃម៉ូដែល AI ប៉ុណ្ណោះទេ ប៉ុន្តែថែមទាំងបានប្រើប្រាស់បច្ចេកវិទ្យាទាំងនោះ ដើម្បីពង្រឹងសមត្ថភាពយោធា និងការស៊ើបការណ៍សម្ងាត់របស់ទីក្រុងប៉េកាំងទៀតផង។

ការចេញមុខព្រមានជាលក្ខណៈអន្តរជាតិនេះ គឺជាផ្នែកមួយនៃយុទ្ធសាស្ត្ររបស់រដ្ឋបាលសហរដ្ឋអាមេរិក ក្នុងការបង្កើតជារបងការពារសកល ដើម្បីទប់ស្កាត់ការរីកសាយភាយនៃបច្ចេកវិទ្យា AI ដែលមានប្រភពមិនច្បាស់លាស់ ឬមានការពាក់ព័ន្ធនឹងការរំលោភបំពានកម្មសិទ្ធិបញ្ញា។ សហរដ្ឋអាមេរិកក៏បានជំរុញឱ្យបណ្ដាប្រទេសជាសម្ព័ន្ធមិត្ត បង្កើនការប្រុងប្រយ័ត្ន និងរឹតបន្តឹងការប្រើប្រាស់កម្មវិធី ឬសេវាកម្មដែលផ្ដល់ដោយ DeepSeek នៅក្នុងប្រព័ន្ធហេដ្ឋារចនាសម្ព័ន្ធសំខាន់ៗរបស់រដ្ឋ។

ជាការឆ្លើយតប កន្លងមកភាគីចិនតែងតែបដិសេធរាល់ការចោទប្រកាន់លើការលួចបច្ចេកវិទ្យា ដោយចាត់ទុកថាវាគឺជាការប៉ុនប៉ងរបស់អាមេរិក ក្នុងការរារាំងការរីកចម្រើនផ្នែកវិទ្យាសាស្ត្ររបស់ចិន។ ទោះជាយ៉ាងណាក៏ដោយ ការព្រមានចុងក្រោយនេះអាចនឹងធ្វើឱ្យក្រុមហ៊ុន DeepSeek ប្រឈមមុខនឹងការដាក់ទណ្ឌកម្មកាន់តែធ្ងន់ធ្ងរ និងអាចត្រូវបានគេបណ្ដេញចេញពីទីផ្សារបច្ចេកវិទ្យានៅក្នុងបណ្ដាប្រទេសលោកខាងលិច ប្រសិនបើភស្តុតាងនៃការលួចបច្ចេកវិទ្យានេះត្រូវបានបង្ហាញកាន់តែច្បាស់៕