(សេអ៊ូល)៖ ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានរាយការណ៍នៅថ្ងៃចន្ទ ទី២៧ ខែមេសា ឆ្នាំ២០២៦ ថាមេដឹកនាំកូរ៉េខាងជើង លោក គីម ជុងអ៊ុន បាននិយាយថាប្រទេសរបស់លោកនឹងបន្តគាំទ្រដល់គោលនយោបាយរបស់រុស្ស៉ី ហើយលោកបានពិភាក្សាអំពីស្ថានការណ៍នយោបាយអន្តរជាតិជាមួយរដ្ឋមន្ត្រីការពារជាតិរុស្ស៉ី។ នេះបើតាមការដកស្រង់ចេញផ្សាយដោយសារព័ត៌មាន Reuters។

KCNA បានឱ្យដឹងថាគណៈប្រតិភូរុស្ស៉ីក្នុងនោះរួមមានទាំងរដ្ឋមន្ត្រីការពារជាតិ លោក Andrei Belousov បានចូលរួមក្នុងពិធីមួយដើម្បីគោរពវិញាណក្ខន្ធរបស់ទាហានកូរ៉េខាងជើងដែលត្រូវបានសម្លាប់អំឡុងការប្រយុទ្ធក្នុងតំបន់ Kursk របស់រុស្ស៉ីជាទីដែលកងកម្លាំងអ៊ុយក្រែនបានបើកប្រតិបត្តិការវាយលុកក្នុងឆ្នាំ២០២៤។ រុស្ស៉ីបានធ្វើសង្រ្គាមលុកលុយចូលអ៊ុយក្រែនក្នុងខែកុម្ភៈ ឆ្នាំ២០២២ និងកំពុងកាន់កាប់១ភាគ៥នៃទឹកដីអ៊ុយក្រែន។ KCNA បានគូសបញ្ជាក់ក្នុងសេចក្ដីរាយការណ៍របស់ខ្លួនដោយស្រង់សម្ដីរបស់លោក គីម ថា «រដ្ឋាភិបាលកូរ៉េខាងជើងនឹងបន្តគាំទ្រយ៉ាងពេញទំហឹងដល់គោលនយោបាយរបស់រុស្ស៉ី ក្នុងការការពារអធិបតេយ្យ បូរណភាពទឹកដី និងផលប្រយោជន៍សន្តិសុខរបស់ខ្លួន»។

កូរ៉េខាងជើងត្រូវបានវាយតម្លៃថាបានបញ្ជូនកងទ័ព ១៤០០០នាក់ទៅជួយជាកម្លាំងដល់កងទ័ពរុស្ស៉ីវាយបណ្ដេញកងទ័ពអ៊ុយក្រែនចេញពីតំបន់ Kursk បន្ទាប់ពីប្រទេសទាំង២បានចុះហត្ថលេខាលើ សន្ធិសញ្ញាការពារគ្នាទៅវិញទៅមក។ កូរ៉េខាងត្បូង អ៊ុយក្រែន និងក្រុមមន្ត្រីលោកខាងលិចបានឱ្យដឹងថាទាហានកូរ៉េខាងជើងប្រហែលជា ៦០០០នាក់ត្រូវបានសម្លាប់ក្នុងសង្រ្គាម។

តាម KCNA​ លោក គីម ជុងអ៊ុនក៏បានជួបប្រធានរដ្ឋសភារុស្ស៉ី លោក Vyacheslav ⁠Volodin និងជាសម្ព័ន្ធមិត្តដ៏ជិតស្និទ្ធរបស់លោកប្រធានាធិបតី ពូទីន ផងដែរជាមួយការគូសបញ្ជាក់ឡើងវិញពីឆន្ទៈរបស់ ប្រទេសទាំង២ក្នុងការពង្រឹងទំនាក់ទំនងទ្វេភាគីឱ្យកាន់តែស៊ីជម្រៅស្របទៅតាមសន្ធិសញ្ញាភាពជាដៃគូយុទ្ធសាស្ត្រគ្រប់ជ្រុងជ្រោយ៕