(Reuters)៖ ចិនបានថ្កោលទោសការអត្ថាធិប្បាយរបស់ជប៉ុន និងសហភាពអឺរ៉ុប (EU​) ពាក់ព័ន្ធនឹងសមុទ្រចិនខាងត្បូង នៅឯកិច្ចប្រជុំមួយរបស់ក្រុមប្រឹក្សាសន្តិសុខ UN កាលពីថ្ងៃចន្ទ ទី២៧ ខែមេសា ឆ្នាំ២០២៦ ខណៈចោទថាទីក្រុងតូក្យូមានអាកប្បកិរិយាបង្ករឿងក្នុងតំបន់ច្រកសមុទ្រតៃវ៉ាន់ ហើយមានផែនការពង្រីកយោធា។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ភាពតានតឹងបានកើតឡើង បន្ទាប់ពីអនុរដ្ឋមន្ត្រីការបរទេសជប៉ុន លោកស្រី Ayano Kunimitsu បានប្រាប់កិច្ចប្រជុំក្រុមប្រឹក្សាសន្តិសុខ UN ស្ដីពីសន្តិសុខសមុទ្រថា ទីក្រុងតូក្យូមានការព្រួយបារម្ភយ៉ាងខ្លាំងអំពីស្ថានការណ៍ក្នុងតំបន់សមុទ្រចិនខាងកើត និងសមុទ្រចិនខាងត្បូង ជាមួយការគូសបញ្ជាក់ឡើងវិញពីការប្រឆាំងជំទាស់របស់ ជប៉ុនទៅនឹងរាល់ការប៉ុនប៉ងដើម្បីការផ្លាស់ប្ដូរស្ថានភាពដើមដោយប្រើកម្លាំងបាយ និងឧបសគ្គរាំងស្ទះដល់សេរីភាពនៃការធ្វើនាវាចរ និងការហោះហើរ។

ជាមួយគ្នានោះ លោក Stavros Lambrinidis ជាប្រធានគណៈប្រតិភូសហភាពអឺរ៉ុបប្រចាំអង្គការសហប្រជាជាតិ ក៏បានលើកឡើងពីភាពតានតឹងនៅក្នុង តំបន់សមុទ្រចិនខាងត្បូងផងដែរ ដោយនិយាយថាភាពតានតឹងកំពុងបង្កការរំខានដល់ការដឹកជញ្ជូន និងបង្កជាបញ្ហាប្រឈមដល់សណ្ដាប់ធ្នាប់អន្តរជាតិផ្អែកលើច្បាប់ជា មូលដ្ឋាន។ ទាំងអ្នកតំណាងជប៉ុន និងសហភាពអឺរ៉ុបមិនបានលើកឈ្មោះចិនចំៗនោះទេ។

ប៉ុន្តែឯកអគ្គរដ្ឋទូតរងចិនប្រចាំ UN លោក Sun Lei បានចាត់ទុកការអត្ថាធិប្បាយរបស់ភាគីជប៉ុនធ្វើឡើងដោយគ្មានហេតុផល ហើយថាអំណាង EU គួរតែចៀសវាង ការធ្វើអត្ថាធិប្បាយដែលគ្មានការពិត និងគ្មានទំនួលខុសត្រូវលើបញ្ហាសមុទ្រចិនខាងត្បូង។

លោក Sun ក៏បានរិះគន់ផងដែរការអត្ថាធិប្បាយរបស់នាយករដ្ឋមន្ត្រីជប៉ុន លោកស្រី Sanae Takaichi កាលពីឆ្នាំមុន ជុំវិញបញ្ហាតៃវ៉ាន់ ដោយសង្កត់ធ្ងន់ថាបានធ្វើឱ្យ ខូចខាតធ្ងន់ធ្ងរដល់ទំនាក់ទំនងរវាងចិន និងជប៉ុន។៕