(ម៉ូស្គូ)៖ នាថ្ងៃពុធនេះ វិមានក្រឹមឡាំងបានប្រកាសថា ប្រទេសរុស្ស៊ីមានផែនការបន្តស្ថិតនៅក្នុងសម្ព័ន្ធភាព OPEC+ ដដែល បើទោះបីជាមានការសម្រេចចិត្តចាកចេញពីសំណាក់ប្រទេសអេមីរ៉ាតអារ៉ាប់រួមក៏ដោយ។ ការសម្រេចចិត្តចាកចេញរបស់ UAE កាលពីថ្ងៃអង្គារ បានក្លាយជាការវាយប្រហារមួយដល់ក្រុមប្រទេសនាំចេញប្រេង ចំពេលដែលវិបត្តិថាមពលបង្កឡើងដោយសង្គ្រាមនៅអ៊ីរ៉ង់។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ​ បានលើកឡើងថា អង្គការ OPEC+ នៅតែជាស្ថាប័នដ៏សំខាន់ ជាពិសេសក្នុងអំឡុងពេលដែលមានភាពច្របូកច្របល់នៅក្នុងទីផ្សារសកលនាពេលបច្ចុប្បន្ន។ លោកបានសង្កត់ធ្ងន់ថា យន្តការនេះជួយកាត់បន្ថយការប្រែប្រួលយ៉ាងខ្លាំងនៃតម្លៃថាមពល និងធ្វើឱ្យទីផ្សារទាំងនោះមានស្ថិរភាពឡើងវិញ។ ទោះជាយ៉ាងណាក៏ដោយ លោកបានបញ្ជាក់ថា រុស្ស៊ីគោរពចំពោះការសម្រេចចិត្តរបស់ UAE ហើយសង្ឃឹមថាការសន្ទនាផ្នែកថាមពលរវាងទីក្រុងមូស្គូ និងរដ្ឋក្នុងតំបន់ឈូងសមុទ្រមួយនេះនឹងនៅតែបន្ត។

ដោយឡែក រដ្ឋមន្ត្រីហិរញ្ញវត្ថុរុស្ស៊ី លោក អាន់តុន ស៊ីលូអាណូវ (Anton Siluanov) បានព្រមានថា ការចាកចេញរបស់ UAE អាចនាំឱ្យបណ្តាប្រទេសនាំចេញប្រេងបង្កើនផលិតកម្មរៀងៗខ្លួនដោយគ្មានការសម្របសម្រួល ដែលនឹងធ្វើឱ្យតម្លៃប្រេងសកលធ្លាក់ចុះនាពេលអនាគត។ លោកបានបន្ថែមថា ហានិភ័យនៃចរន្តផ្គត់ផ្គង់លើសតម្រូវការ នឹងក្លាយជាបញ្ហាប្រឈមនៅពេលដែលច្រកសមុទ្រដ៏សំខាន់នេះត្រូវបានបើកដំណើរការឡើងវិញនាពេលខាងមុខ៕​