(កៀវ)៖ អគ្គរដ្ឋអាជ្ញាអ៊ុយក្រែន នាថ្ងៃពុធនេះបានដាក់សំណើជាផ្លូវការទៅកាន់អ៊ីស្រាអែល ដើម្បីឱ្យចាប់ឃាត់នាវាដឹកទំនិញមួយគ្រឿង ដែលទីក្រុងកៀវ អះអាងថាបានដឹកស្រូវសាលីលួចចេញពីតំបន់ត្រួតត្រារបស់រុស្ស៊ី ក្នុងទឹកដីអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ជម្លោះការទូតរវាងប្រទេសទាំងពីរបានឡើងកម្ដៅខ្លាំង បន្ទាប់ពីលោក រូស្លាន់ ក្រាវឆេនកូ (Ruslan Kravchenko) អគ្គរដ្ឋអាជ្ញាអ៊ុយក្រែន បានបញ្ជាក់ថា នាវាឈ្មោះ Panormitis កំពុងធ្វើដំណើរឆ្ពោះទៅកាន់កំពង់ផែហៃហ្វា (Haifa) របស់អ៊ីស្រាអែល ជាមួយស្រូវសាលីដែលត្រូវបានផ្ទេរចេញពីតំបន់កាន់កាប់ដោយខុសច្បាប់។ អ៊ុយក្រែនបានស្នើឱ្យដៃគូអ៊ីស្រាអែលធ្វើការឆែកឆេរនាវា រឹបអូសឯកសារពាក់ព័ន្ធ យកសំណាកស្រូវសាលីទៅពិនិត្យ និងធ្វើការសាកសួរក្រុមនាវិកផងដែរ។

ជាការឆ្លើយតប រដ្ឋមន្ត្រីការបរទេសអ៊ីស្រាអែល លោក ហ្គីឌៀន សា (Gideon Saar) បានរិះគន់អ៊ុយក្រែនថាបានប្រើប្រាស់ «ការទូតលើបណ្ដាញសង្គម Twitter» ជាជាងការអនុវត្តតាមនីតិវិធីច្បាប់ជាមុន។ លោកបានបញ្ជាក់តាមរយៈបណ្ដាញសង្គម X ថា អ៊ីស្រាអែលទើបតែទទួលបានសំណើជាផ្លូវការពីអ៊ុយក្រែនកាលពីយប់ថ្ងៃអង្គារប៉ុណ្ណោះ ហើយបច្ចុប្បន្នអាជ្ញាធរមានសមត្ថកិច្ចកំពុងធ្វើការពិនិត្យលើសំណើនេះ។ កាលពីពេលកន្លងទៅ អ៊ីស្រាអែលធ្លាប់បានបញ្ជាក់ថា អ៊ុយក្រែនមិនបានផ្ដល់ភស្តុតាងរឹងមាំណាមួយ ដើម្បីគាំទ្រដល់ការចោទប្រកាន់របស់ខ្លួននោះឡើយ៕​