បទវិភាគ៖ ហេតុអ្វីបានជារថយន្តរបស់ចិនអាចនាំមុខគេនៅលើពិភពលោកទាំងមូល?
30-04-2026 17:57
(ប៉េកាំង)៖ សាកថ្មគ្រាន់តែ៥នាទី អាចបើកបរបន្ថែម៤រយគីឡូម៉ែត្រ ហើយអាចបន្ថយល្បឿនដោយស្វ័យប្រវត្តិនៅពេលជួបឧបសគ្គ។ល។ ក្នុងពិព័រណ៍រថយន្តអន្តរជាតិក្រុងប៉េកាំងលើកទី១៩ឆ្នាំ២០២៦ បច្ចេកវិទ្យាទំនើបៗគ្រប់បែបយ៉ាងបានបង្ហាញមុខព្រមៗគ្នា ដែលធ្វើឱ្យអ្នកផងទាំងពួងមានចក្ខុវិស័យកាន់តែទូលំទូលាយចំពោះរថយន្ត។
ប្រទេសចិនជា “មជ្ឈមណ្ឌលស្រូបទាញ” ការច្នៃប្រឌិតថ្មីរបស់រថយន្ត ប្រទេសចិនហាក់ដូចជា “កន្លែងហាត់ប្រាណ”របស់ឧស្សាហកម្មរថយន្តសកល ។ល។ ប្រព័ន្ធសារព័ត៌មានបរទេសនិងសហគ្រាសបរទេស សុទ្ធតែផ្តោតការយកចិត្តទុកដាក់ចំពោះពិព័រណ៍រថយន្តនេះដែលមានទ្រង់ទ្រាយធំបំផុត នៅលើពិភពលោកដោយសម្គាល់ឃើញថា ប្រទេសចិនបាននិងកំពុងក្លាយជាទិសដៅដែលណែនាំការច្នៃប្រឌិតថ្មី ខាងបច្ចេកទេសរបស់ឧស្សាហកម្មរថយន្តសកល។
ឆ្នាំនេះ ខ្សែសង្វាក់ផ្គត់ផ្គង់និងសហគ្រាសវិទ្យាសាស្ត្រនិងបច្ចេកវិទ្យាចំនួនលើសពី២ពាន់ ដែលមកពីប្រទេសនិងតំបន់ចំនួន២១ បានចូលរួមពិព័រណ៍ដែលបានគ្រប់ដណ្តប់គ្រប់ប្រភេទ គ្រប់វិស័យនិងគ្រប់ស្រទាប់ថ្នាក់។ មានរថយន្តចំនួន១៤៥១ គ្រឿង ត្រូវបានដាក់តាំងបង្ហាញ ក្នុងនោះមានរថយន្តចំនួន១៨១គ្រឿង បង្ហាញមុខជាលើកដំបូង និងរថយន្តគំនិត (Concept Car) ចំនួន៧១គ្រឿង។ ម៉ាករបស់ចិនបានប្រកាសបច្ចេកទេសគន្លឹះចំនួន៤២ផ្នែក ដែលបានបំបែកកំណត់ត្រាថ្មីក្នុងប្រវិត្តសាស្ត្រ ។
ក្នុងពិព័រណ៍រថយន្តអន្តរជាតិក្រុងប៉េកាំងលើកនេះ មានបច្ចេកទេសពីរផ្នែកបានទាក់ទាញអ្នកផងទាំងពួងយ៉ាងខ្លាំង ។ មួយផ្នែក គឺបច្ចេកទេសថ្មបានដោះស្រាយភាពលំបាក លើវិស័យអាយុកាលថ្មនិងបន្ថែមថាមពល មួយផ្នែកទៀត ការប្រើប្រាស់បញ្ញាសិប្បនិមិ្មត លើវិស័យជាច្រើនបានធ្វើឱ្យរថយន្តបំពាក់ “ខួរក្បាលដ៏វៃឆ្លាត” ។ ឥឡូវនេះ រថយន្តមិនត្រឹមតែជាមធ្យោបាយ សម្រាប់ធ្វើដំណើរប៉ុណ្ណោះទេ ប៉ុន្តែថែមទាំងជា "ទម្រង់ជីវិតឆ្លាតវៃចល័ត” ដែលរួមបញ្ចូលប្រព័ន្ធជាច្រើនដូចជា តួរថយន្ត ថាមពល ព័ត៌មានកម្សាន្ត និងជំនួយបើកបរជាដើម។
ហេតុអ្វីបានជាប្រទេសចិនបានក្លាយជា "កន្លែងហាត់ប្រាណ” នៃឧស្សាហកម្មរថយន្តសកល? មូលហេតុពីឬសគល់គឺស្ថិតនៅលើ “ឧត្តមភាពផ្នែកច្នៃប្រឌិតថ្មីជាប្រព័ន្ធ” តែមួយគត់របស់ប្រទេសចិន ដែលមិនត្រឹមតែបង្កើតជាដំណើរវិលជុំបិទខ្ទប់ទាំងស្រុងចាប់ពីវត្ថុធាតុដើមនិងគ្រឿងបន្លាស់ស្នូលរហូតដល់ ការផលិតរថយន្តទាំងមូលប៉ុណ្ណោះទេ ប៉ុន្តែថែមទាំងបានក្លាយជា "ប្រភពនៃការច្នៃប្រឌិត” សម្រាប់ឧស្សាហកម្មរថយន្តសកល តាមរយៈភាពជោគជ័យខាងបច្ចេកវិទ្យាលើវិស័យអាគុយ ការបើកបរដោយស្វ័យប្រវត្តិ និងកាប៊ីនឆ្លាតវៃជាដើម។
បន្ទាប់ពីកិច្ចខិតខំប្រឹងប្រែងអស់រយៈពេលជាច្រើនឆ្នាំ បរិមាណផលិតនិងលក់រថយន្តរបស់ប្រទេសចិន បានជាប់ចំណាត់ថ្នាក់ទី១លើពិភពលោក ក្នុងរយៈពេល១៧ឆ្នាំជាប់ៗគ្នា។ នៅក្នុងត្រីមាសទីមួយឆ្នាំនេះ ការនាំចេញរថយន្តរបស់ប្រទេសចិន បានកើនឡើង៥៦,៧% បើប្រៀបធៀបនឹងរយៈពេលដូចគ្នានៃឆ្នាំមុន ក្នុងនោះ ការនាំចេញរថយន្តថាមពលថ្មីបានកើនឡើង ១.២ដងបើប្រៀបធៀបនឹងរយៈពេលដូចគ្នានៃឆ្នាំមុន។
បើនិយាយចំពោះក្រុមហ៊ុនផលិតរថយន្តបរទេស “ល្បឿនរបស់ចិន” គឺជាភាពទាក់ទាញដ៏ធំបំផុត។ ទិន្នន័យរបស់ ក្រុមហ៊ុនប្រឹក្សាយោបល់អាមេរិក Alix Partners បង្ហាញថា ការអភិវឌ្ឍសម្រាប់រថយន្តថាមពលថ្មីនៅក្នុងប្រទេសចិន មានរយៈពេលប្រហែល ២០ខែដែលបានបង្រួញពេលពាក់កណ្តាល បើប្រៀបធៀបនឹងក្រុមហ៊ុនផលិតរថយន្តប្រពៃណី។ ដោយពឹងផ្អែកលើអត្ថប្រយោជន៍ពីប្រសិទ្ធភាពខ្សែសង្វាក់ផ្គត់ផ្គង់ បច្ចេកវិទ្យាឈានមុខគេ ទីផ្សារដ៏រឹងមាំនិងសេណារីយ៉ូកម្មវិធីដ៏សម្បូរបែប នៅក្នុងប្រទេសចិន ក្រុមហ៊ុនផលិតរថយន្តបរទេស ក៏បានកាត់បន្ថយវដ្តស្រាវជ្រាវនិងអភិវឌ្ឍន៍យ៉ាងច្រើនផងដែរ។
ក្នុងបរិបទបច្ចុប្បន្នដែលថាមពលសកលមានកង្វះខាតនិងកំពុងធ្វើបរិវត្តកម្មបៃតងក្រុមហ៊ុនផលិតរថយន្តចិន កំពុងផ្លាស់ប្តូរពី "ការនាំចេញផលិតផល" ទៅជា " ការនាំចេញប្រព័ន្ធអេកូឡូស៊ី" ពោលគឺនាំយកសមត្ថភាពផលិតកម្ម ខ្សែសង្វាក់ផ្គត់ផ្គង់ រហូតដល់ស្តង់ដារបច្ចេកទេសទៅដល់ក្រៅប្រទេស តាមទម្រង់វិនិយោគលើរោងចក្រ បង្កើតមជ្ឈមណ្ឌលសិក្សាស្រាវជ្រាវនិងអភិវឌ្ឍន៍ និងបង្កើតក្រុមហ៊ុនបណ្តាក់ទុនរួមគ្នា ដែលក្លាយជាការគាំទ្រដ៏សំខាន់ សម្រាប់ជំរុញការធ្វើបរិវត្តកម្មបៃតងរបស់ពិភពលោក។
ឆ្លងតាមរយៈបង្អួចនៃពិព័រណ៍រថយន្តប៉េកាំង មនុស្សអាចមើលឃើញយ៉ាងច្បាស់ថា ប្រទេសចិនកំពុងបន្តពង្រឹងអន្តរកម្មជាមួយពិភពលោក តាមរយៈការបើកចំហរនិងកិច្ចសហប្រតិបត្តិការ ដោយប្រែក្លាយ "ភាពទាក់ទាញ” របស់ខ្លួនទៅជា "សមត្ថភាពច្នៃប្រឌិតថ្មី” របស់សហគ្រាស ដើម្បីធ្វើឱ្យភាគលាភនៃការធ្វើទំនើបកម្មតាមបែបផែនចិន មានអំណោយផលដល់ពិភពលោកទាំងមូល៕
វិទ្យុមិត្តភាពកម្ពុជាចិន
