(ឌូបៃ)៖ ទោះបីជាសង្គ្រាមជាច្រើនសប្តាហ៍បានធ្វើឱ្យបញ្ហាសេដ្ឋកិច្ចរបស់អ៊ីរ៉ង់កាន់តែដុនដាប ប៉ុន្តែរបបដឹកនាំទីក្រុងតេហេរ៉ង់ ហាក់នៅតែមានសមត្ថភាពអាចរស់រានបានពីការប្រឈមមុខដាក់គ្នានៅតំបន់ឈូងសមុទ្រ ខណៈដែលការរំពឹងទុករបស់ប្រធានាធិបតីអាមេរិក លោក ដូណាល់ ត្រាំ លើការដួលរលំភ្លាមៗរបស់អ៊ីរ៉ង់ អាចនឹងមិនកើតឡើងក្នុងពេលឆាប់ៗនោះទេ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

បច្ចុប្បន្ន អ៊ីរ៉ង់កំពុងស្ថិតក្នុងភាពជាប់គាំងជាមួយសហរដ្ឋអាមេរិក និងអ៊ីស្រាអែល បន្ទាប់ពីកិច្ចចរចាសន្តិភាពអចិន្ត្រៃយ៍បានជួបភាពរកាំរកូស ខណៈដែលទីក្រុងតេហេរ៉ង់បន្តបិទច្រកសមុទ្រហ័រមូស ហើយអាមេរិកក៏បន្តបិទខ្ទប់កំពង់ផែរបស់អ៊ីរ៉ង់យ៉ាងតឹងរ៉ឹង។ ទោះបីជាហេដ្ឋារចនាសម្ព័ន្ធរងការខូចខាតធ្ងន់ធ្ងរ ប៉ុន្តែអ៊ីរ៉ង់បានប្រើប្រាស់យុទ្ធសាស្ត្រ «សេដ្ឋកិច្ចតស៊ូ» (Resistance Economy) ដោយពឹងផ្អែកលើធនធានផ្ទៃក្នុង ការប្រើប្រាស់ប្រាក់សន្សំរបស់ប្រជាជន និងការធ្វើពាណិជ្ជកម្មតាមព្រំដែនគោកជាមួយប្រទេសជិតខាង ដើម្បីទប់ទល់នឹងសម្ពាធពីខាងក្រៅ។

អ្នកស្រី សាណាម វ៉ាគីល (Sanam Vakil) ប្រធានកម្មវិធីមជ្ឈិមបូព៌ានៃស្ថាប័ន Chatham House ក្នុងទីក្រុងឡុងដ៍ បានលើកឡើងថា មេដឹកនាំសាសនា និងកងឆ្មាំបដិវត្តន៍អ៊ីរ៉ង់ (IRGC) មានសមត្ថភាពគ្រប់គ្រងប្រទេសយ៉ាងរឹងមាំ និងប្រើប្រាស់វិធានការបង្ក្រាបដើម្បីរក្សាអំណាច ខណៈរង់ចាំកិច្ចព្រមព្រៀងសន្តិភាពណាមួយដែលផ្តល់ផលប្រយោជន៍ដល់ពួកគេ។ អ្នកស្រីយល់ថា អ៊ីរ៉ង់បានត្រៀមខ្លួនសម្រាប់ផ្លូវមួយដែលវែងឆ្ងាយជាងអ្វីដែលអ្នកសេដ្ឋកិច្ច ឬអ្នកបង្កើតគោលនយោបាយលោកខាងលិចបានប៉ាន់ស្មានទុក។

ស្ថានភាពនេះកំពុងក្លាយជាបញ្ហាប្រឈមយុទ្ធសាស្ត្រសម្រាប់រដ្ឋបាលលោក ត្រាំ ដែលកំពុងប្រឈមមុខនឹងបញ្ហាអតិផរណាសកល និងការបោះឆ្នោតពាក់កណ្តាលអាណត្តិដែលកាន់តែខិតជិតមកដល់។ បើទោះបីជាមានសេចក្តីរាយការណ៍ថា ស្ថានភាពផ្ទៃក្នុងអ៊ីរ៉ង់អាចនឹងឈានទៅរកវិបត្តិធ្ងន់ធ្ងរ ប្រសិនបើទណ្ឌកម្មមិនត្រូវបានលើកលែងក៏ដោយ ប៉ុន្តែការរំពឹងថាអ៊ីរ៉ង់នឹងចុះចាញ់ក្នុងល្បែងសង្រ្គាមសេដ្ឋកិច្ចនេះភ្លាមៗ ហាក់នៅតែជាការស្មានដែលមិនទាន់មានភាពច្បាស់លាស់នៅឡើយ៕