(ប៉ាណាម៉ា)៖ ប្រធានាធិបតីប៉ាណាម៉ា លោក Jose Raul Mulino បានឱ្យដឹងថាប្រទេសរបស់លោក ព្យាយាមរក្សាទំនាក់ទំនងវិជ្ជមានជាមួយចិន ទោះបីកំពុងកៀបក្នុងជម្លោះរវាងមហាអំណាចអាស៉ីនេះ និងសហរដ្ឋអាមេរិកក៏ដោយ ហើយលោកបានពន្យល់ ជុំវិញបញ្ហាដកហូតសិទ្ធិគ្រប់គ្រងកំពង់ផែមួយរបស់ចិន នៅប៉ាណាម៉ា។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសុក្រ ទី១ ខែឧសភា ឆ្នាំ២០២៦។

លោកបាននិយាយក្នុង​សន្និសីទសារព័ត៌មាន ក្រោយទទួលបានសារសំខាន់ពី​រដ្ឋាភិបាល​ចិន ពាក់ព័ន្ធនឹងកុងត្រា​ក្រុមហ៊ុនហុងកុង CK Hutchison នៅប្រទេសប៉ាណាម៉ា ដែលកំពុងប្តឹងប្តល់គ្នាក្នុង​តុលាការ​មជ្ឈត្តការអន្តរជាតិ​ថា រឿងនេះមិន​បាន​បង្កើត​ជា​បញ្ហា​ រវាង​រដ្ឋាភិបាល​ប៉ាណាម៉ា និង​ចិន​ឡើយ។ លោក Mulino ប្រាប់ក្រុមអ្នកសារព័ត៌មានថា «យើង​កំពុង​ ហើយស្ថិតក្នុងផ្លូវមួយ ដែលត្រូវបានរុំដោយផលវិបាកនៃជម្លោះ​រវាង​មហាអំណាចអាមេរិក​ និង​ចិន»។

CK Hutchison តាមរយៈក្រុមហ៊ុនក្នុងស្រុករបស់ប៉ាណាម៉ា គឺ Panama Ports Company បានបាត់បង់សិទ្ធិគ្រប់គ្រងកំពង់ផែដែលធ្លាប់កាន់កាប់អស់ជិត ៣ទសវត្សរ៍ ក្រោមការសម្រេចរបស់តុលាការកំពូលប៉ាណាម៉ា កាលពីខែមករា ដែលត្រូវបានគេមើលឃើញយ៉ាងទូលំទូលាយថា ដោយសារតែសម្ពាធពីអាមេរិក ជុំវិញការកំណត់ឥទ្ធិពលចិននៅលើផ្លូវទឹកយុទ្ធសាស្ត្រនេះ។ លោក Mulino គូសបញ្ជាក់ថា «យើងមិនបានរឹបអូសទេ យើងដកហូតសិទ្ធិកាន់កាប់កំពង់ផែនោះ ពីព្រោះវាត្រូវបានទុកចោលដោយគ្មានកុងត្រា ខ្ញុំមិនចាប់អារម្មណ៍ធ្វើឱ្យបញ្ហានេះកាន់តែធ្ងន់ធ្ងរជាមួយចិនឡើយ»។

គួរបញ្ជាក់ថា ព្រែកជីក​ប៉ាណាម៉ា​ រ៉ាប់រង​ពាណិជ្ជកម្ម​ផ្លូវ​សមុទ្រ​ពិភពលោក ៥ភាគរយ។ ការ​គ្រប់គ្រងលើ​កំពង់ផែ​ចូល បានក្លាយ​ជា​ចំណុច​ក្តៅ​នៃ​ភាព​តានតឹង​ភូមិសាស្ត្រ​នយោបាយ​រវាង​ទីក្រុង​វ៉ាស៉ីនតោន និង​ទីក្រុង​ប៉េកាំង៕