(អាហ្រ្វិក)៖ ការបិទខ្ទប់ច្រកសមុទ្រ Hormuz ក៏ដូចជាភាពតានតឹងនៅសមុទ្រក្រហម (Red Sea) កំពុងធ្វើឱ្យផ្លូវពាណិជ្ជកម្មផ្លាស់ប្តូរ ដោយទ្វីបអាហ្វ្រិក បានក្លាយមជ្ឈមណ្ឌលសកល ក្នុងការទទួលកប៉ាល់ដឹកកុងតឺន័រ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នាថ្ងៃសុក្រ ទី១ ខែឧសភា ឆ្នាំ២០២៦។

ក្នុងរយៈពេល ២ខែចុងក្រោយ ការបិទខ្ទប់ក៏បានជំរុញឱ្យម្ចាស់កប៉ាល់ ស្វែងរកច្រករបៀងដីគោកជំនួសផងដែរ ដើម្បីដឹកជញ្ជូនស្បៀងអាហារ និងទំនិញផលិតកម្មតាមរថយន្តដឹកទំនិញវិញ ព្រោះវាលែងអាចទៅដល់ប្រទេស នៃឈូងសមុទ្រពែរ្ស តាមផ្លូវសមុទ្របានទៀតហើយ។

Kpler ដែលជាក្រុមហ៊ុនតាមដាននាវាចរណ៍ បានឱ្យដឹងថា ការប្តូរផ្លូវដឹកជញ្ជូនតាមសមុទ្រ បានក្លាយជាប្រព័ន្ធ។ កប៉ាល់នានាធ្វើដំណើរជុំវិញទ្វីបអាហ្វ្រិក ដោយរត់កាត់ឆ្នេរសមុទ្រភាគខាងកើត រហូតដល់ច្រក Cape of Good Hope នៅភាគខាងត្បូងនៃប្រទេសអាហ្វ្រិកខាងត្បូង មុនពេលធ្វើដំណើរត្រឡប់ទៅភាគខាងជើងវិញ ឆ្ពោះទៅទ្វីបអឺរ៉ុប និងសមុទ្រមេឌីទែរ៉ាណេ។

តាមអ្នកជំនាញខ្សែចង្វាក់ផ្គត់ផ្គង់នៅ Efeso ដែលជាក្រុមហ៊ុនប្រឹក្សាយោបល់ផ្នែកគ្រប់គ្រង នៅទីក្រុងប៉ារីស សព្វថ្ងៃនេះ ៧០ភាគរយនៃចរាចរណ៍ទំនិញ ដែលធ្លាប់ឆ្លងកាត់សមុទ្រក្រហម ក្នុងឆ្នាំ ២០២៣ កំពុងប្តូរផ្លូវមកច្រក Cape of Good Hope។ ពេលវេលាដឹកជញ្ជូន ត្រូវអូសបន្លាយជាមធ្យមពីរសប្តាហ៍ រវាងអាស៉ី និងអឺរ៉ុប ហើយថ្លៃដើមក៏កើនឡើង ដោយសារតែតម្រូវការប្រេងឥន្ធនៈបន្ថែមពី ៣០ភាគរយទៅ ៥០ភាគរយ និងចំនួនកប៉ាល់បន្ថែមពី ១០ទៅ ២០ភាគរយទៀត ដើម្បីធានាបាននូវសេវាកម្មដូចធម្មតា៕