(ប៉េកាំង)៖ កាលពីថ្ងៃសៅរ៍ ទី២ ខែឧសភា ឆ្នាំ២០២៦ ក្រសួងពាណិជ្ជកម្មចិន បានប្រកាសថា ប្រទេសចិននឹងមិនទទួលយកដាច់ខាត ចំពោះការដាក់ទណ្ឌកម្ម​ពីសំណាក់សហរដ្ឋអាមេរិក ប្រឆាំងមកលើក្រុមហ៊ុនចំនួន៥ ដែលត្រូវបានកំណត់គោលដៅដោយសារការទិញប្រេងពីអ៉ីរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ចិនគឺជាអតិថិជនដ៏សំខាន់មួយនៃប្រេងរបស់ប្រទេសអ៉ីរ៉ង់ ខណៈសហរដ្ឋអាមេរិក កំពុងព្យាយាមរាំងខ្ទប់លំហូរប្រាក់ចំណូលរបស់ទីក្រុងតេហេរ៉ង់។ សេចក្តីបង្គាប់ផ្លូវការរបស់ក្រសួងពាណិជ្ជកម្មចិន ពាក់ព័ន្ធទៅនឹងទណ្ឌកម្មរបស់អាមេរិកដែលត្រូវបានប្រកាសជាបន្តបន្ទាប់ ចាប់តាំងពីឆ្នាំមុន បានកំណត់ថា ចំណាត់ការទាំងនោះ មិនគួរត្រូវបានទទួលស្គាល់ អនុវត្តន៍ ឬគោរពតាមដាច់ខាត។

ក្រសួងពាណិជ្ជកម្មចិន បានលើកឡើងថា ទណ្ឌកម្មរបស់អាមេរិក ធ្វើការរឹតត្បិតដោយមិនត្រឹមត្រូវ ចំពោះសហគ្រាសចិន ដោយហាមមិនឱ្យធ្វើសកម្មភាពសេដ្ឋកិច្ច និងពាណិជ្ជកម្មជាធម្មតា ជាមួយប្រទេសទី៣ ហើយបំពានច្បាប់អន្តរជាតិក៏ដូចជាបទដ្ឋានទូទៅស្តីពីទំនាក់ទំនងអន្តរជាតិ ដូច្នេះហើយ រដ្ឋាភិបាលចិនតែងតែប្រឆាំង​ជានិច្ចចំពោះការដាក់ទណ្ឌកម្មបែបឯកតោភាគី ដែលខ្វះការអនុញ្ញាតពី UN និងមូលដ្ឋាននៅក្នុងច្បាប់អន្តរជាតិ។

សេចក្តីបង្គាប់ខាងលើ គឺអនុវត្តទៅលើក្រុមហ៊ុនចម្រាញ់ប្រេង៣ នៅក្នុងខេត្ត Shandong រួមមាន Shandong Jincheng Petrochemical Group, Shandong Shouguang Luqing Petrochemical និង Shandong Shengxing Chemical ហើយ២ក្រុមហ៊ុននៅកន្លែងផ្សេងទៀតក្នុងប្រទេសចិន រួមមាន Hengli Petrochemical (Dalian) Refinery និង Hebei Xinhai Chemical Group។ កាលពីថ្ងៃសុក្រសប្តាហ៍នេះ ទីក្រុងវ៉ាស៉ីនតោន ទើបតែបានដាក់ទណ្ឌកម្មលើក្រុមហ៊ុនចិន១ទៀត ដែលខ្លួនចោទថា បាននាំចូលប្រេងឆៅរាប់សិបលានបារ៉ែលពីអ៉ីរ៉ង់ ហើយបង្កើតប្រាក់ចំណូលរាប់ពាន់លានដុល្លារ សម្រាប់ទីក្រុងតេហេរ៉ង់។ ក្រុមហ៊ុននោះ គឺ Qingdao Haiye Oil Terminal ប៉ុន្តែមិនមានឈ្មោះ នៅក្នុងសេចក្តីបង្គាប់ខាងលើរបស់ក្រសួងពាណិជ្ជកម្មចិនទេ។

គួរបញ្ជាក់ថា ការដាក់ទណ្ឌកម្មប៉ុន្មានចុងក្រោយ គឺស្របពេលដែលទីក្រុងវ៉ាស៉ីនតោន និងទីក្រុងតេហេរ៉ង់ កំពុងជាប់គាំងក្នុងកិច្ចចរចាស្វែងរកសន្តិភាព ដែលមិនទាន់មានពន្លឺនៃដំណោះស្រាយជាអចិន្រ្តៃយ៍នៅឡើយទេ សម្រាប់ជម្លោះដែលបានផ្ទុះឡើង នៅពេលអាមេរិករួមដៃជាមួយអ៉ីស្រាអែល ធ្វើសង្រ្គាមផ្លូវអាកាសប្រឆាំងប្រទេសអ៉ីរ៉ង់ កាលពីចុងខែកុម្ភៈ។ ក្នុងខែឧសភានេះ ប្រធានាធិបតីអាមេរិក លោក ដូណាល់ ត្រាំ នឹងត្រូវធ្វើទស្សនកិច្ចមកកាន់ប្រទេសចិន ដើម្បីបើកកិច្ចប្រជុំកំពូលជាមួយប្រធានាធិបតី ស៉ី ជីនពីង៕