(វីយែន)៖ ទីភ្នាក់ងារថាមពលអាតូមិកអន្តរជាតិ (IAEA) នាថ្ងៃអាទិត្យនេះ​​​ បានទទួលដំណឹងពីរោងចក្រថាមពលនុយក្លេអ៊ែរ Zaporizhzhia ដែលគ្រប់គ្រងដោយរុស្ស៊ីថា មានយន្តហោះដ្រូនមួយគ្រឿង បានវាយប្រហារលើមន្ទីរពិសោធន៍ត្រួតពិនិត្យវិទ្យុសកម្មពីខាងក្រៅរបស់រោងចក្រ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

យោងតាមរបាយការណ៍របស់ IAEA មិនមានមនុស្សរងរបួសនៅក្នុងហេតុការណ៍នេះទេ ហើយបច្ចុប្បន្នគេក៏មិនទាន់ដឹងច្បាស់ថា តើការវាយប្រហារនេះបានបង្កការខូចខាតដល់កម្រិតណាដល់មន្ទីរពិសោធន៍ ដែលមានទីតាំងស្ថិតនៅក្រៅបរិវេណរោងចក្រថាមពលនុយក្លេអ៊ែរនោះឡើយ។ អគ្គនាយក IAEA លោក រ៉ាហ្វាអែល ហ្គ្រូស៊ី (Rafael Grossi) បានបញ្ជាក់ថា ក្រុមការងារ IAEA ប្រចាំនៅទីនោះ បានស្នើសុំចូលទៅពិនិត្យទីតាំងមន្ទីរពិសោធន៍ផ្ទាល់ ដើម្បីវាយតម្លៃស្ថានភាព។

ជាមួយគ្នានេះ លោក ហ្គ្រូស៊ី ក៏បានរំលឹកជាថ្មីនូវការព្រមានថា រាល់ការវាយប្រហារណាមួយដែលកើតឡើងនៅក្បែរទីតាំងនុយក្លេអ៊ែរ គឺសុទ្ធសឹងតែអាចបង្កជាហានិភ័យដ៏ធ្ងន់ធ្ងរដល់សុវត្ថិភាពនុយក្លេអ៊ែរ។ គួរបញ្ជាក់ថា រោងចក្រ Zaporizhzhia គឺជាមជ្ឈមណ្ឌលថាមពលនុយក្លេអ៊ែរដ៏ធំបំផុតនៅក្នុងតំបន់អឺរ៉ុប ដែលបច្ចុប្បន្នកំពុងស្ថិតក្រោមការត្រួតត្រារបស់កងកម្លាំងរុស្ស៊ី ចំពេលមានសង្គ្រាមអូសបន្លាយនៅអ៊ុយក្រែន៕​