(វ៉ាស៉ីនតោន)៖ រដ្ឋមន្រ្តីហិរញ្ញវត្ថុអាមេរិក លោក Scott Bessent បានស្នើដល់ប្រទេសចិន បង្កើនកិច្ចខិតខំប្រឹងប្រែងផ្នែកការទូតរបស់ខ្លួន ដើម្បីបញ្ចុះបញ្ចួលអ៉ីរ៉ង់ឱ្យបើកច្រកសមុទ្រ Hormuz ដែលជាផ្លូវពាណិជ្ជកម្មអន្តរជាតិ ដោយបន្ថែមថា ប្រធានាធិបតី ដូណាល់ ត្រាំ និងប្រធានាធិបតី ស៉ី ជីនពីង នឹងពិភាក្សាគ្នាអំពីប្រធានបទនេះ ក្នុងជំនួបសប្តាហ៍ក្រោយ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃអង្គារ ទី៥ ខែឧសភា ឆ្នាំ២០២៦។

«ចិន​ សូមបង្កើនមធ្យោបាយ​ការទូត​ខ្លះ ធ្វើឱ្យអ៉ីរ៉ង់​បើក​ច្រក​សមុទ្រ»។ នេះជាការគូសបញ្ជាក់របស់ លោក Bessent ក្នុងបទសម្ភាសជាមួយទូរទស្សន៍ Fox News។

តាមលោក Bessent ប្រធានាធិបតី ត្រាំ និងប្រធានាធិបតី ស៉ី បាននិងកំពុងពិភាក្សាជុំវិញបញ្ហាអ៉ីរ៉ង់ ហើយគ្រោងផ្លាស់ប្តូរទស្សនយោបល់គ្នាផ្ទាល់ អំឡុងជំនួបពីថ្ងៃទី១៤ ដល់ថ្ងៃទី១៥ ខែឧសភា នៅទីក្រុងប៉េកាំង។ ប៉ុន្តែ​លោក​បាន​សង្កត់ធ្ងន់ថា មេដឹកនាំទាំងពីរ ក៏នឹង​ខិតខំ​រក្សា​ស្ថិរភាព​ទំនាក់ទំនង​អាមេរិក​-​ចិន ​ដែល​ភ្ជាប់ដោយ​បទ​ឈប់​បាញ់ក្នុងសង្រ្គាម​ពាណិជ្ជកម្ម កាលពី​ខែតុលា​ ផងដែរ៕