(តូក្យូ)៖ ប្រព័ន្ធផ្សព្វផ្សាយក្នុងស្រុកនៅប្រទេសជប៉ុន បានរាយការណ៍ថា ជប៉ុនទើបទទួលបានប្រេងរុស្ស៉ីជាលើកដំបូង ចាប់តាំងពីលំហូរផ្គត់ផ្គង់ប្រេងរបស់ពិភពលោក ត្រូវបានរឹតត្បិតដោយសារតែការបិទខ្ទប់ច្រកសមុទ្រ Hormuz នៅពេលសង្រ្គាមអ៉ីរ៉ង់ផ្ទុះឡើង។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី៥ ខែឧសភា ឆ្នាំ២០២៦។

កប៉ាល់ដឹកប្រេងឆៅរបស់រុស្ស៉ី បានមកដល់ទីក្រុង Imabari ភាគខាងលិចប្រទេសជប៉ុន កាលពីថ្ងៃចន្ទ។ ជប៉ុនដែលពឹងផ្អែកលើ​តំបន់មជ្ឈិមបូព៌ា សម្រាប់ការនាំចូលប្រេងប្រហែល៩៥ភាគរយ បានព្យាយាមធ្វើពិពិធកម្មប្រភពសម្រាប់ទិញថាមពល ចាប់តាំងពីពេលផ្ទុះសង្រ្គាមកាលពីថ្ងៃទី២៨ ខែកុម្ភៈ ដែលនាំឱ្យទីក្រុងតេហេរ៉ង់បិទខ្ទប់ច្រកសមុទ្រ Hormuz។ ក្រុមហ៊ុនប្រេងជប៉ុន Taiyo Oil ទទួលបានសំណើពីក្រសួងសេដ្ឋកិច្ច ដើម្បីទទួលយកប្រេងរុស្ស៉ី ដែលនឹងត្រូវបញ្ជូនទៅកាន់រោងចក្រចម្រាញ់ ដើម្បីបំប្លែងជាប្រេងសាំង និងផលិតផលប្រេងដទៃទៀត។

កាលពីថ្ងៃចន្ទ ថ្លែងចេញពីទីក្រុងកង់បេរ៉ា ក្រោយជំនួបជាមួយនាយករដ្ឋមន្រ្តីអូស្រ្តាលី លោក Anthony Albanese នាយករដ្ឋមន្រ្តីជប៉ុន លោកស្រី Sanae Takaichi បាននិយាយថា ការរឹតត្បិតលំហូរប្រេងជាសកល កំពុងជះផលប៉ះពាល់យ៉ាងធំសម្បើម ចំពោះតំបន់អាស៉ី-ប៉ាស៉ីហ្វិក។ លោកស្រី បានបន្តថា ជប៉ុននិងអូស្រ្តាលី នឹងឆ្លើយតបជាបន្ទាន់ ដើម្បីធានាឱ្យបានការផ្គត់ផ្គង់ថាមពល ដែលមានស្ថិរភាព។

គួរបញ្ជាក់ថា ជាធម្មតាប្រេងនិងឧស្ម័នប្រហែល២០ភាគរយរបស់ពិភពលោកទាំងមូល គឺត្រូវបានដឹកជញ្ជូនឆ្លងកាត់ច្រកសមុទ្រ Hormuz ហើយការបិទខ្ទប់ប៉ុន្មានខែមកនេះ បានធ្វើឱ្យតម្លៃប្រេងហក់ឡើងយ៉ាងខ្ពស់ជាសកល៕