(សេអ៊ូល)៖ នាថ្ងៃអង្គារ​ ទី៥ ខែឧសភា ឆ្នាំ២០២៦ កូរ៉េខាងត្បូងបាននិយាយថា ខ្លួននឹងពិនិត្យមើលឡើងវិញចំពោះជំហររបស់ខ្លួន ជុំវិញការចូលរួមប្រតិបត្តិការរបស់សហរដ្ឋអាមេរិក នៅឯច្រកសមុទ្រ Hormuz បន្ទាប់ពីប្រធានាធិបតីអាមេរិក លោក ដូណាល់ ត្រាំ បានទទូចឱ្យទីក្រុងសេអ៊ូលចូលរួម ក្រោយកប៉ាល់១គ្រឿងរបស់កូរ៉េខាងត្បូង ទំនងជាបានរងការវាយប្រហារពីអ៉ីរ៉ង់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ការផ្ទុះនិងអគ្គិភ័យត្រូវបានរាយការណ៍ នៅលើកប៉ាល់ដឹកទំនិញកូរ៉េខាងត្បូង១គ្រឿង កាលពីថ្ងៃចន្ទ នៅច្រកសមុទ្រ Hormuz ដែល​ត្រូវបានបិទខ្ទប់ចាប់តាំងពីសង្រ្គាមមជ្ឈិមបូព៌ា ផ្ទុះឡើងកាលពីថ្ងៃទី២៨ ខែកុម្ភៈ។ នាថ្ងៃអង្គារនេះ ក្រសួងការបរទេសកូរ៉េខាងត្បូង បាននិយាយថា នាវិកទាំង២៤នាក់នៅលើកប៉ាល់ឈ្មោះ HMM Namu ក្នុងនោះមានជនជាតិកូរ៉េខាងត្បូងផ្ទាល់៦នាក់ គឺមិនបាន​រងគ្រោះថ្នាក់ទេ។

លោក ដូណាល់ ត្រាំ បាននិយាយថា ឧប្បត្តិហេតុខាងលើ គួរតែជំរុញឱ្យកូរ៉េខាងត្បូង ចូលរួមកិច្ចប្រឹងប្រែងរបស់យោធាអាមេរិក ដើម្បីជួយនាំផ្លូវកប៉ាល់ពាណិជ្ជកម្មជាប់គាំង ធ្វើដំណើរឆ្លងកាត់ច្រកសមុទ្រ Hormuz ដែលជាច្រកដ៏សំខាន់សម្រាប់ការនាំចេញប្រេង ដែលទីក្រុងសេអ៊ូលពឹងផ្អែកលើជាចាំបាច់។ នាថ្ងៃអង្គារនេះ ក្រសួងការពារជាតិកូរ៉េខាងត្បូង បាននិយាយថា ខ្លួននឹងពិនិត្យឡើងវិញ​ដោយប្រុងប្រយ័ត្ន ចំពោះគោលជំហររបស់ខ្លួន ប៉ុន្តែមិនធ្វើការប្តេជ្ញាណាមួយទេ។

គួរបញ្ជាក់ថា យោងតាមទិន្នន័យពីវែបសាយតាមដានចរាចរណ៍ផ្លូវសមុទ្រ MarineTraffic កប៉ាល់ HMM Namu ជាកប៉ាល់ដឹកទំនិញមានប្រវែងជិត ១៨០ម៉ែត្រ ដែលធ្វើដំណើរក្រោមទង់ជាតិប៉ាណាម៉ា។ មន្រ្តីកូរ៉េខាងត្បូង បានប្រាប់ថា អគ្គិភ័យដែលកើតឡើងនៅលើកប៉ាល់នោះ ត្រូវបានពន្លត់ទៅវិញទាំងស្រុង៕