(វ៉ាស៉ីនតោន)៖ កាលពីថ្ងៃចន្ទ ទី៤ ខែឧសភា ឆ្នាំ២០២៦ យោធាអាមេរិកបានឱ្យដឹងថា ខ្លួនបានវាយប្រហារទូកសង្ស័យដឹកគ្រឿងញៀន ១គ្រឿង នៅតំបន់សមុទ្រ Caribbean ដោយសម្លាប់មនុស្ស២នាក់នៅលើនោះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ក្នុងសេចក្តីប្រកាសអំពីការវាយប្រហារខាងលើ យោធាអាមេរិក បានប្រើសេចក្តីថ្លែងការណ៍ដដែលៗដូចរាល់ដង ដោយនិយាយថា ទូកនោះធ្វើប្រតិបត្តិការដោយជនជួញដូរគ្រឿងញៀន និងធ្វើដំណើរនៅលើច្រកផ្លូវដែលគេស្គាល់ថា ជាផ្លូវសម្រាប់ធ្វើសកម្មភាពរត់ពន្ធគ្រឿងញៀន ប៉ុន្តែពុំមានការបង្ហាញភស្តុតាងរឹងមាំជាក់ស្តែងណាមួយឡើយ។

វាគឺជាការវាយប្រហារថ្មីចុងក្រោយបង្អស់ ដែលក្រុមសិទ្ធិមនុស្សនិងក្រុមអ្នកជំនាញផ្នែកច្បាប់ ថ្កោលទោសថា ជាការសម្លាប់មនុស្ស​នៅក្រៅប្រព័ន្ធយុត្តិធម៌ ក្នុងយុទ្ធនាការមួយចាប់ផ្តើមតាំងតែពីខែកញ្ញា ឆ្នាំ២០២៥ ដែលរដ្ឋបាលប្រធានាធិបតីអាមេរិក ដូណាល់ ត្រាំ បានអះអាងថា មានគោលដៅប្រឆាំងក្រុមភេរវករគ្រឿងញៀន។ ក្រៅពីតំបន់ Caribbean យោធាអាមេរិក ក៏បានធ្វើប្រតិបត្តិការវាយប្រហារនៅតំបន់ភាគខាងកើតមហាសមុទ្រប៉ាស៉ីហ្វិក ផងដែរ។

គួរបញ្ជាក់ថា ទោះបីមានសង្រ្គាមនៅអ៉ីរ៉ង់ក៏ដោយ យោធាអាមេរិក អំឡុងប៉ុន្មានសប្តាហ៍ចុងក្រោយនេះ បានបង្កើនការវាយប្រហារសាជាថ្មី លើទូកសង្ស័យដឹកគ្រឿងញៀន នៅ Caribbean និងប៉ាស៉ីហ្វិក៕