(Reuters)៖ តម្លៃមាសបានហក់ឡើងជាង ២ភាគរយ នាថ្ងៃពុធ ទី៦ ខែឧសភា ឆ្នាំ២០២៦ បន្ទាប់ពីប្រធានាធិបតីអាមេរិក លោក ដូណាល់ ត្រាំ លើកឡើងពីលទ្ធភាពសម្រេចកិច្ចព្រមព្រៀងជាមួយអ៉ីរ៉ង់ ធ្វើឱ្យលុយដុល្លារចុះថោក។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

តម្លៃមាសសម្រាប់លក់ចេញឬទិញចូលភ្លាមៗ មានតម្លៃ ៤ ៦៦៩ដុល្លារក្នុងមួយអោន គិតត្រឹមព្រឹកថ្ងៃពុធ ដែលជាការកើនឡើងដល់កម្រិតខ្ពស់ គិតចាប់តាំងពីថ្ងៃទី២៨ ខែមេសា។ ចំណែកតម្លៃមាសក្នុងកិច្ចសន្យាទិញលក់នាខែមិថុនា បានឡើងដល់ ៤ ៦៧៨ដុល្លារក្នុងមួយអោន។

អ្នកវិភាគទីផ្សារជាន់ខ្ពស់ម្នាក់ បាននិយាយថា តម្លៃមាសមានការកើនឡើង ស្របពេលដែលការថមថយកម្តៅ នៃភាពតានតឹងក្នុងជម្លោះនៅមជ្ឈិមបូព៌ា ធ្វើឱ្យតម្លៃប្រេងធ្លាក់ចុះ ជាហេតុនាំកាត់បន្ថយក្តីបារម្ភអំពីកំណើនអតិផរណានិងអត្រាការប្រាក់ ខណៈប្រការនេះនាំឱ្យមាស ក្លាយជាទ្រព្យទាក់ទាញសម្រាប់ការវិនិយោគ។ ទោះជាបែបនេះក្តី ប្រសិនបើភាពតានកើនឡើងកម្តៅជាថ្មី នោះតម្លៃមាសអាចនឹងធ្លាក់ចុះទៅវិញ ដោយសារក្រុមអ្នកវិនិយោគ នាំគ្នាលក់ចេញដើម្បីទទួលបានប្រាក់ចំណេញរយៈពេលខ្លី។

គួរបញ្ជាក់ថា ស្របពេលរូបិយប័ណ្ណ​អាមេរិក​ធ្លាក់ថ្លៃ លោហៈនានាដែលជាទូទៅជួញដូរគិតជាលុយដុល្លារ គឺមានតម្លៃថោក សម្រាប់អ្នកទិញដែលប្រើប្រាស់រូបិយប័ណ្ណដទៃ។ តម្លៃប្រេងឆៅខ្ពស់ អាចជំរុញអតិផរណា និងបង្កើនលទ្ធភាពនៃការដំឡើងអត្រាការប្រាក់ ប៉ុន្តែខណៈដែលមាសត្រូវបានចាត់ទុក ថាអាចយកមកការពារអតិផរណាបានក៏ដោយ អត្រាការប្រាក់ខ្ពស់ ក៏នឹងធ្វើឱ្យទ្រព្យសកម្មដទៃទៀត មានភាពទាក់ទាញជាងមាសផងដែរ៕