(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ នាថ្ងៃពុធ នេះបានថ្លែងថា ប្រសិនបើប្រទេសអ៊ីរ៉ង់គោរពតាមលក្ខខណ្ឌដែលបានព្រមព្រៀងគ្នា នោះសង្គ្រាមរវាងអាមេរិក-អ៊ីស្រាអែល និងអ៊ីរ៉ង់ អាចនឹងត្រូវបញ្ចប់ ហើយច្រកសមុទ្រហ័រមូស នឹងត្រូវបើកដំណើរការឡើងវិញ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

តាមរយៈការបង្ហោះសារលើបណ្តាញសង្គម Truth Social លោក ត្រាំ បានបញ្ជាក់ថា ក្នុងករណីដែលអ៊ីរ៉ង់យល់ព្រមតាមសំណើ ប្រតិបត្តិការយោធាដែលលោកហៅថា "Epic Fury" នឹងត្រូវបញ្ចប់ ហើយវិធានការបិទខ្ទប់កំពង់ផែនឹងត្រូវដកចេញ ដើម្បីអនុញ្ញាតឱ្យច្រកសមុទ្រហ័រមូសបើកចំហសម្រាប់នាវាចរណ៍គ្រប់ប្រភេទ រួមទាំងនាវារបស់អ៊ីរ៉ង់ផងដែរ។

ទោះជាយ៉ាងណាក៏ដោយ មេដឹកនាំអាមេរិករូបនេះបានសង្កត់ធ្ងន់ក្នុងន័យព្រមានយ៉ាងម៉ឺងម៉ាត់ថា ប្រសិនបើភាគីអ៊ីរ៉ង់មិនព្រមព្រៀងតាមសំណើនេះទេ សកម្មភាពទម្លាក់គ្រាប់បែកនឹងត្រូវចាប់ផ្តើមឡើងវិញភ្លាមៗ ហើយវានឹងមានកម្រិត និងអាំងតង់ស៊ីតេខ្លាំងក្លាជាងមុនឆ្ងាយណាស់៕​