(ញូវយ៉ក)៖ លោក Ted Turner សហគ្រិនអាមេរិក ដែលជាអ្នកនាំឱ្យមានការផ្លាស់ប្តូរយ៉ាងខ្លាំង ក្នុងការផ្សាយព័ត៌មានលើទូរទស្សន៍ នៅក្នុងសហរដ្ឋអាមេរិក ក៏ដូចជានៅទូទាំងពិភពលោក តាមរយៈការបង្កើតបណ្តាញទូរទស្សន៍ព័ត៌មាន CNN កាលពីឆ្នាំ១៩៨០ ទើបតែបានទទួលមរណភាព ក្នុងវ័យ៨៧ឆ្នាំ។ នេះបើតាមការចេញផ្សាយដោយ ទីភ្នាក់ងារព័ត៌មាន CNA នាថ្ងៃព្រហស្បតិ៍ ទី៧ ខែឧសភា ឆ្នាំ២០២៦។

ដំណឹងមរណភាពរបស់លោក Turner ត្រូវបានប្រកាសដោយទូរទស្សន៍ CNN កាលពីថ្ងៃពុធ។ CNN ដែលមានឈ្មោះពេញថា Cable News Network បាននាំមកនូវការផ្លាស់ប្តូរទាំងស្រុង ក្នុងវិស័យប្រព័ន្ធផ្សព្វផ្សាយនៅអាមេរិក ជាមួយការផ្តោតជាចម្បងរបស់ទូរទស្សន៍នេះ ទៅលើការផ្សាយព័ត៌មានទាន់ហេតុការណ៍ជាប់ ២៤ម៉ោង។ CNN ត្រូវបានគេចាប់ផ្តើមស្គាល់ជាសកល តាមរយៈការផ្សាយទាក់ទង​អំពីសង្រ្គាមឈូងសមុទ្រ ឬ Gulf War នៅមជ្ឈិមបូព៌ា កាលពីឆ្នាំ១៩៩០ និង១៩៩១។ CNN គឺជាបណ្តាញទូរទស្សន៍ដំបូងបង្អស់ ដែលផ្សាយព័ត៌មានសុទ្ធឥតឈប់ ហើយមកដល់សព្វថ្ងៃនេះ CNN បានពង្រីកវត្តមានដោយមានការិយាល័យ អ្នករាយការណ៍ និង​ទស្សនិកជន នៅជុំវិញពិភពលោក និងត្រូវបានចាត់ទុកជា ប្រព័ន្ធផ្សព្វផ្សាយព័ត៌មានដ៏ល្បីបំផុតមួយ។

គួរបញ្ជាក់ថា លោក Ted Turner បានក្លាយជាមហាសេដ្ឋី តាមរយៈការស្នងមុខជំនួញផ្ទាំងប៉ាណូពាណិជ្ជកម្មរបស់ឪពុកលោក រួចហើយបានទិញស្ថានីយទូរទស្សន៍តូចមួយ នៅឆ្នាំ១៩៧០ បន្ទាប់មកប្រែក្លាយវាទៅជាអាណាចក្រប្រព័ន្ធផ្សព្វផ្សាយដ៏ធំសម្បើមមួយ។ លោកបានរៀបការនិងលែងលះសរុប៣លើក ដោយមានកូនចំនួន៥នាក់។ អាពាហ៍ពិពាហ៍លើកទី៣របស់លោក ជាមួយលោកស្រី Fonda ដែលមានរយៈពេល១០ឆ្នាំ បានបញ្ចប់ទៅតាំងតែពីឆ្នាំ២០០១។ បើតាមទស្សនាវដ្តី Forbes លោក Turner មានទ្រព្យសម្បត្តិជិត ៣ពាន់លានដុល្លារ៕