(ឡុងដ៏)៖ បញ្ហាផ្គត់ផ្គង់ប្រេងអាចនឹងកាន់តែតឹងតែង នៅប៉ុន្មានសប្តាហ៍ទៅមុខ ទោះបីជាសហរដ្ឋអាមេរិក និងអ៉ីរ៉ង់ឈានដល់កិច្ចព្រមព្រៀងសន្តិភាពក៏ដោយ ពីព្រោះវាត្រូវចំណាយពេលច្រើន សម្រាប់ការដឹកជញ្ជូនចេញពីឈូងសមុទ្រមជ្ឈិមបូព៌ា និងដើម្បីទៅដល់ក្រុមហ៊ុនចម្រាញ់ប្រេងទូទាំងពិភពលោក ដូច្នេះក្រុមហ៊ុនប្រេង ប្រហែលជាបន្ថយការដឹកជញ្ជូនខ្លះ ដើម្បីទុកបំពេញតម្រូវការខ្លាំង​នៅរដូវក្តៅ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃព្រហស្បតិ៍ ទី៧ ខែឧសភា ឆ្នាំ២០២៦។

បណ្តានាយកប្រតិបត្តិក្រុមហ៊ុនថាមពល ធនាគារវិនិយោគ និងអ្នកវិភាគទីផ្សារ បានឱ្យដឹងថា ពិភពលោកបានប្រើប្រាស់​មធ្យោបាយបណ្តោះអាសន្ន ដូចជាស្តុកប្រេងពាណិជ្ជកម្ម ប្រេងជាប់គាំងនៅសមុទ្រ និងប្រេងបម្រុងសម្រាប់សង្គ្រោះបន្ទាន់ មកទូទាត់ផលប៉ះពាល់ពីសង្គ្រាមមជ្ឈិមបូព៌ា។ នេះផលប៉ះពាល់ពីការរំខានចំពោះការផ្គត់ផ្គង់ប្រេងលើទីផ្សារ និងសេដ្ឋកិច្ចពិភពលោកនៅមិនទាន់ទាំងស្រុងផង ចុះប្រសិនគេត្រូវចំណាយពេលរាប់ខែ ដើម្បីធ្វើឱ្យការផលិត និងនាំចេញនៅមជ្ឈិមបូព៌ា ត្រឡប់ទៅរកកម្រិតដូចមុនពេលមានសង្គ្រាមវិញ នឹងមានអ្វីកើតឡើង?

ទន្ទឹមនេះ ការថយចុះយ៉ាងឆាប់រហ័សនៃស្តុកប្រេងពាណិជ្ជកម្ម និងប្រេងបម្រុងសម្រាប់សង្គ្រោះបន្ទាន់ បានកើតឡើងនៅពេលដែលស្តុកប្រេងចេះតែកើន ខណៈក្រុមហ៊ុនចម្រាញ់ប្រេង និងអ្នកលក់រាយ កំពុងត្រៀមខ្លួនសម្រាប់តម្រូវការខ្លាំងអំឡុងរដូវក្តៅ។ ប្រព័ន្ធថាមពលសកល នឹងចូលទៅក្នុងតម្រូវការកំពូលនាពេលឆាប់ៗ ក្នុងស្ថានភាពដែលមិនមានប្រេងគ្រប់គ្រាន់ សម្រាប់ដោះស្រាយការកើនឡើងនូវការបើកបរក្នុងរដូវក្តៅ សេវាកម្មអាកាសចរណ៍ កសិកម្ម និងការដឹកជញ្ជូនទំនិញ។

កត្តាទាំងនោះហើយ ធ្វើឱ្យប្រព័ន្ធថាមពលពិភពលោកតានតឹង និងពន្យឺតពេលសម្រាប់អ្នកផលិត និងចម្រាញ់ប្រេង ដើម្បីយកមកបំបាត់ភាពខ្វះខាតក្នុងការផ្គត់ផ្គង់ និងបញ្ចុះតម្លៃប្រេងឥន្ធនៈឱ្យទៅកម្រិតមុនសង្គ្រាម៕