(តូក្យូ)៖ ប្រទេសជប៉ុន និងអេមីរ៉ាតអារ៉ាប់រួម (UAE) បានឯកភាពគ្នាក្នុងការជំរុញកិច្ចពិភាក្សាអំពីកិច្ចសហប្រតិបត្តិការថាមពល រួមមានការពង្រីកការស្ដុកទុកប្រេងឆៅរួមគ្នានៅក្នុងប្រទេសជប៉ុន និងការបង្កើនការផ្គត់ផ្គង់ប្រេងពី UAE។ នេះបើតាមការបញ្ជាក់របស់ក្រសួងឧស្សាហកម្មជប៉ុន កាលពីថ្ងៃព្រហស្បតិ៍។

រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន លោក រីយ៉ូសី អាកាហ្សាវ៉ា (Ryosei Akazawa) បានបំពេញទស្សនកិច្ចនៅអារ៉ាប៊ីសាអូឌីត និង UAE កាលពីដើមសប្តាហ៍នេះ ដើម្បីពង្រឹងសន្តិសុខថាមពល និងស្ថិរភាពនៃការផ្គត់ផ្គង់។ ក្នុងជំនួបជាមួយថ្នាក់ដឹកនាំក្រុមហ៊ុនប្រេងរដ្ឋរបស់ UAE លោកបានស្នើឱ្យមានការបង្កើនទិន្នផលប្រេង ការបំពេញបន្ថែមស្ដុកបម្រុងឱ្យបានឆាប់រហ័ស និងការស្វែងរកផ្លូវដឹកជញ្ជូនថ្មីៗ ដើម្បីឆ្លើយតបនឹងវិបត្តិដែលកំពុងកើតមាន។

ជុំវិញបញ្ហានេះ ជប៉ុនក៏បានបញ្ជាក់ជំហរថា បើទោះបីជាក្រុមហ៊ុនជប៉ុនមួយចំនួនទើបតែបានបញ្ជាទិញប្រេងឆៅពីរុស្ស៊ីក៏ដោយ ក៏ជប៉ុនមិនផ្លាស់ប្តូរគោលនយោបាយគាំទ្រអ៊ុយក្រែន និងការដាក់ទណ្ឌកម្មលើរុស្ស៊ីរួមជាមួយក្រុមប្រទេស G7 នោះឡើយ។ ការស្វែងរកប្រភពផ្គត់ផ្គង់ឱ្យកាន់តែសម្បូរបែប រួមទាំងការបន្តយកប្រេងពីរុស្ស៊ីក្នុងកម្រិតកំណត់ គឺជាភាពចាំបាច់សម្រាប់សន្តិសុខថាមពលរបស់ជប៉ុន ដើម្បីឆ្លើយតបនឹងវិបត្តិដែលកំពុងកើតមាននៅមជ្ឈិមបូព៌ា៕​