(តៃប៉ិ)៖ នាថ្ងៃសុក្រ ទី៨ ខែឧសភា ឆ្នាំ២០២៦ តៃវ៉ាន់បានទទួលស្វាគមន៍ប្រធានាធិបតីប៉ារ៉ាហ្កាយ លោក Santiago Pena ដោយកម្រាលព្រំក្រហម ចំពោះមុខការបង្កើនសម្ពាធការទូតរបស់ចិន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

សព្វថ្ងៃ ទីក្រុងតៃប៉ិ នៅសល់សម្ព័ន្ធមិត្តការទូតត្រឹមចំនួន១២ប៉ុណ្ណោះ បន្ទាប់ពីទីក្រុងប៉េកាំង ដែលចាត់ទុកដែនកោះនេះ ជាផ្នែកនៃទឹកដីរបស់ចិន បានអូសទាញប្រទេសដទៃទៀត ឱ្យដោះដៃចោលតៃវ៉ាន់ ដើម្បីព្យាយាមធ្វើឱ្យតៃប៉ិឯកោ នៅលើឆាកអន្តរជាតិ។ ប៉ារ៉ាហ្កាយគឺជាសម្ព័ន្ធមិត្តតែមួយគត់របស់តៃវ៉ាន់នៅទ្វីបអាមេរិកខាងត្បូង។

លោក ​Pena ដែលនឹងបំពេញទស្សនកិច្ចរយៈពេល៤ថ្ងៃនៅតៃវ៉ាន់ ធ្លាប់បានពិពណ៌នាតៃវ៉ាន់ ថាជាដៃគូដ៏សំខាន់បំផុតមួយរបស់​ប្រទេសប៉ារ៉ាហ្កាយ។ ក្នុងឱកាសទទួលស្វាគមន៍ខាងលើ មេដឹកនាំតៃវ៉ាន់ លោក Lai Ching-te បានអរគុណលោកប្រធានាធិបតីប៉ារ៉ាហ្កាយ និងរដ្ឋាភិបាលរបស់លោក សម្រាប់ការជួយបង្ហាញសំឡេងគាំទ្រជាយូរមកហើយ​ចំពោះតៃវ៉ាន់នៅលើឆាកអន្តរជាតិ។ លោក Lai បានបន្តថា តៃវ៉ាន់និងប៉ារ៉ាហ្កាយ គឺជាដៃគូដែលប្តេជ្ញាយ៉ាងមុតមាំចំពោះ​តម្លៃនៃលទ្ធិប្រជាធិបតេយ្យ សេរីភាព និងសិទ្ធិមនុស្ស។

ដំណើរទស្សនកិច្ចរបស់លោក Pena កើតមានឡើង បន្ទាប់ពីលោក Lai Ching-te ទើបតែត្រឡប់មកពីបំពេញទស្សនកិច្ច​នៅប្រទេសអេស្វាទីនី ដែលជាសម្ព័ន្ធមិត្តតែមួយគត់របស់តៃវ៉ាន់នៅទ្វីបអាហ្រ្វិក។ តៃវ៉ាន់បានចោទចិនថា បានព្យាយាមរារាំង​ទស្សនកិច្ចរបស់លោក Lai ទៅកាន់អេស្វាទីនី តាមរយៈការដាក់សម្ពាធយ៉ាងខ្លាំងឱ្យប្រទេសចំនួន៣ នៅមហាសមុទ្រឥណ្ឌា រួមមាន Seychelles, Mauritius និង Madagascar លុបចោលការផ្តល់សិទ្ធិហោះហើរឆ្លងកាត់ សម្រាប់គម្រោងទស្សនកិច្ចដើម​របស់លោក Lai ដែលត្រូវបានគ្រោងប្រព្រឹត្តទៅ ពីថ្ងៃទី២២ ដល់ទី២៦ ខែមេសា ហើយត្រូវបានលុបចោលវិញ។ ទីបំផុត លោក Lai ត្រូវបង្ខំចិត្តប្រើប្រាស់យន្តហោះរបស់មហាក្សត្រអេស្វាទីនី ដើម្បីធ្វើដំណើរទៅដល់ប្រទេសអាហ្រ្វិកនោះ កាលពីដើមខែឧសភានេះ។

គួរបញ្ជាក់ថា ដំណើរទស្សនកិច្ចផ្លូវការលើកចុងក្រោយរបស់លោក Lai គឺត្រូវបានធ្វើឡើងកាលពីខែវិច្ឆិកា ឆ្នាំ២០២៤ នៅពេលដែល​លោកបំពេញទស្សនកិច្ចទៅកាន់ បណ្តាប្រទេសដែនកោះនៅប៉ាស៉ីហ្វិក ដែលជាសម្ព័ន្ធមិត្តតៃវ៉ាន់ ហើយឆ្លៀតឈប់សំចតនៅកោះ Guam ដែលជាដែនដីរបស់សហរដ្ឋអាមេរិក៕