(ញូវដែលី)៖ នាយករដ្ឋមន្ត្រីឥណ្ឌា លោក Narendra Modi បានជំរុញឱ្យមានដាក់ចេញនូវវិធានការទ្រង់ទ្រាយធំនានាដេីម្បីសន្សំសំចៃប្រេង ដោយសារបញ្ហាតម្លៃថាមពលឡេីងថ្លៃជាសកលកំពុងដាក់សម្ពាធលើទុនបម្រុងរូបិយប័ណ្ណបរទេសរបស់ប្រទេសឥណ្ឌា។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃចន្ទ ទី១១ ខែឧសភា ឆ្នាំ២០២៦។

លោក Modi និយាយថាប្រជាជនគួរតែគិតទៅដល់របៀបធ្វើការពីផ្ទះ រៀបប្រជុំតាមអនឡាញ ប្រើមធ្យោបាយដឹកជញ្ជូនសាធារណៈ​ ដូចជារថភ្លើងក្រោមដី និងការជិះរថយន្តរួមគ្នាដែលអាចសន្សំប្រេងបានមួយផ្នែក។

លោក Modi បន្ថែមថាក្នុងស្ថានភាពបច្ចុប្បន្ន ឥណ្ឌាក៏ត្រូវតែផ្តោតខ្លាំងលើការសន្សំរូបិយប័ណ្ណបរទេសផងដែរ ជាមួយការណែនាំដល់ប្រជាជនឱ្យចៀសវាងការទិញមាស ដែលត្រូវចំណាយច្រើនអំឡុងពេលរៀបអាពាហ៍ពិពាហ៍ និងកាត់បន្ថយការធ្វើដំណើរទៅក្រៅប្រទេសដែលមិនចាំបាច់យ៉ាងហោចណាស់មួយឆ្នាំ ដើម្បីសន្សំទុករូបិយប័ណ្ណបរទេស។

លោកក៏បានអំពាវនាវឱ្យប្រជាជនកាត់បន្ថយការប្រើប្រាស់ប្រេងឆា ដោយពណ៌នាថាចលនានោះថាដេីម្បីសុខភាពល្អ និងស្នេហាជាតិ ហេីយស្នើកសិករកាត់បន្ថយការប្រើប្រាស់ជីកសិកម្មក្នុងចំនួនពាក់កណ្តាលនៃតម្រូវការ។

គួរបញ្ជាក់ថា​ ឥណ្ឌាជាប្រទេសនាំចូលប្រេង និងអ្នកប្រើប្រាស់ប្រេងធំជាងគេទី៣របស់ពិភពលោក៕