(កាប៊ុល)៖ នាថ្ងៃអង្គារ ទី១២ ខែឧសភា ឆ្នាំ២០២៦ អង្គការសហប្រជាជាតិ (UN) បានរាយការណ៍ថា ជនស៉ីវិលអាហ្វហ្កានីស្ថាន​យ៉ាងហោច៣៧២នាក់ត្រូវបានសម្លាប់ ក្នុងជម្លោះរវាងរដ្ឋាភិបាលតាលីបង់ និងប្រទេសប៉ាគីស្ថាន កាលពីអំឡុងរយៈពេល៣ខែដំបូង​នៃឆ្នាំនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ទំនាក់ទំនងរវាងទីក្រុងអ៉ីស្លាម៉ាបាដនិងទីក្រុងកាប៊ុល បានធ្លាក់ដុនដាបចាប់តាំងពីក្រុមតាលីបង់ បានត្រឡប់មកកាន់អំណាចសាជាថ្មី កាលពីឆ្នាំ២០២១ ហើយបានរីករាលដាលទៅជា អ្វីដែលរដ្ឋមន្រ្តីការពារជាតិប៉ាគីស្ថាន ហៅថា «សង្រ្គាមបើកចំហ» កាលពីខែកុម្ភៈ។ ទីក្រុងអ៉ីស្លាម៉ាបាដ បានចោទរដ្ឋាភិបាលតាលីបង់នៅអាហ្វហ្កានីស្ថានថា ផ្តល់កន្លែងជ្រកកោនដល់ក្រុមសកម្មប្រយុទ្ធ ដែលនៅពីក្រោយការកើនឡើងនៃសកម្មភាពវាយប្រហារ ជាពិសេសក្រុមតាលីបង់ប៉ាគីស្ថាន ដែលបានធ្វើយុទ្ធនាការបង្កហិង្សា រយៈពេលច្រើនឆ្នាំមកហើយ។ ទីក្រុងកាប៊ុលបានបដិសេធការចោទប្រកាន់ និងចោទទៅវិញថា ប៉ាគីស្ថានទម្លាក់កំហុសនៃភាពកម្សោយផ្នែកសន្តិសុខរបស់ខ្លួន មកលើអាហ្វហ្កានីស្ថាន និងមិនគោរពអធិបតេយ្យរបស់អាហ្វហ្កានីស្ថាន។

បេសកកម្មជំនួយ UN ប្រចាំអាហ្វហ្កានីស្ថាន ហៅកាត់ UNAMA បាននិយាយថា គិតត្រឹមចន្លោះថ្ងៃទី១ ខែមករា ដល់ថ្ងៃទី៣១ ខែមីនា ឆ្នាំ២០២៦ UNAMA បានកត់ត្រាជនស៉ីវិលដែលត្រូវបានសម្លាប់សរុបចំនួន៣៧២នាក់ និងរបួស៣៩៧នាក់ ដោយសារ​អំពើហិង្សាប្រដាប់អាវុធឆ្លងព្រំដែន រវាងកងកម្លាំងសន្តិសុខអាហ្វហ្កានីស្ថាន និងកងកម្លាំងយោធាប៉ាគីស្ថាន។ ក្នុងសំណេរឆ្លើយតប​របាយការណ៍របស់ UNAMA ទីក្រុងអ៉ីស្លាម៉ាបាដ បានអះអាងថា ជនស៉ីវិលក៏ដូចជាកងកម្លាំងសន្តិសុខរបស់ប៉ាគីស្ថានចំនួន ១៣០នាក់ ក៏ត្រូវបានសម្លាប់ផងដែរ ក្នុងជម្លោះជាមួយអាហ្វហ្កានីស្ថាន គិតចាប់តាំងពីដើមឆ្នាំ២០២៦។

គួរបញ្ជាក់ថា ការប៉ះទង្គិចគ្នាឆ្លងព្រំដែនដែលបន្តជាយូរមកហើយរវាងអាហ្វហ្កានីស្ថាននិងប៉ាគីស្ថាន បានកើនឡើងខ្លាំងកាលពី​ខែតុលា ឆ្នាំ២០២៥ ហើយបានផ្តាច់ជីវិតមនុស្សរាប់សិបនាក់ ប៉ុន្តែក្រោយស្ងប់ស្ងាត់ទៅវិញបានមួយរយៈ ការប្រយុទ្ធគ្នាបានបន្តឡើងវិញ កាលពីអំឡុងចុងខែកុម្ភៈ ឆ្នាំនេះ៕