(ប៉េកាំង)៖ ប្រធានាធិបតីអាមេរិក លោក ដូណាល់ ត្រាំ នៅថ្ងៃព្រហស្បតិ៍ ទី១៤ ខែឧសភា ឆ្នាំ២០២៦ បានប្រាប់ប្រធានាធិបតីចិន លោក ស៊ី ជីនពីង ថាកំពូលមហាអំណាចទាំង២ នឹងមានអនាគតរួមគ្នាដ៏អស្ចារ្យមួយ ខណៈមេដឹកនាំទាំង២បានជួបគ្នាហើយសម្រាប់កិច្ចប្រជុំកំពូលក្នុងទីក្រុងប៉េកាំង។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

ថ្លែងនៅឯជំនួបក្នុងសាលវិមានប្រជាជនចិន លោក ត្រាំ បានគូសបញ្ជាក់ដូច្នេះថា «វាជាកិត្តិយសណាស់ដែលបានជួបអ្នក (លោក ស៊ី ជីនពីង)។ វាជាកិត្តិយសណាស់ដែលបានធ្វើជាមិត្តរបស់អ្នក ហើយទំនាក់ទំនងចិន និងសហរដ្ឋអាមេរិកនឹងមានភាពល្អប្រសើរមិនធ្លាប់មានពីមុនមក»។ លោក ត្រាំបន្តទៀតថាប្រទេសទាំង២នឹងឆ្ពោះទៅរកអនាគតដ៏អស្ចារ្យជាមួយគ្នា។

ចំណែក លោក ស៊ី ជីនពីងវិញ ក៏បានប្រាប់លោក ដូណាល់ ត្រាំដែរថាចិន និងសហរដ្ឋអាមេរិកគួរតែធ្វើជាដៃគូនឹងគ្នា មិនមែនធ្វើជាគូប្រជែងនោះទេ។ «ទំនាក់ទំនងស្ថិរភាពរវាងចិន និងសហរដ្ឋអាមេរិកគឺជារឿងល្អមួយសម្រាប់ពិភពលោក។ កិច្ចសហប្រតិបត្តិការផ្ដល់ផលប្រយោជន៍ដល់ប្រទេសទាំង២ ខណៈការប្រឈមមុខដាក់គ្នានឹងបង្កការខាតបង់ដល់ ប្រទេសទាំង២។ ដូច្នេះយើងគួរតែធ្វើជាដៃគូ មិនមែនជាគូប្រជែងនោះទេ»។ នេះជាការបញ្ជាក់របស់លោក ស៊ី ជីនពីងប្រាប់លោក ត្រាំ។

លោក ស៊ី ជីនពីង ក៏បានបន្ថែមដែរថារូបលោកពិតជាសប្បាយរីករាយដែលបានទទួលស្វាគមន៍លោក ត្រាំ សម្រាប់ដំណើរទស្សនកិច្ចជាលើកដំបូងបំផុតរបស់មេដឹកនាំអាមេរិក មកកាន់ ប្រទេសចិនចាប់តាំងពីឆ្នាំ២០១៧ និងចំពេលពិភពលោកកំពុងស្ថិតនៅលើផ្លូវបំបែក។ ប៉ុន្តែក្រុមអ្នកវិភាគមើលឃើញគេមិនអាចរំពឹងច្រើនឡើយថាកិច្ចប្រជុំកំពូលរវាងលោក ត្រាំ និងលោក ស៊ី ជីនពីង នឹងសម្រេចបានលទ្ធផលដ៏ភ្ញាក់ផ្អើលណាមួយ ដោយសារតែធម្មជាតិនៃភាពជាគូប្រជែងរវាងប្រទេសទាំង២។

មេដឹកនាំទាំង២ ត្រូវបានរំពឹងថានឹងពិភាក្សាគ្នាលើរបៀបវារៈរួមមានពាណិជ្ជកម្ម សង្រ្គាមអ៉ីរ៉ង់ AI តៃវ៉ាន់ និងការគ្រប់គ្រងអាវុធនុយក្លេអ៊ែរ។ មុនធ្វើទស្សនកិច្ចទៅចិន លោក ត្រាំ បាននិយាយថាជំនួបរបស់លោកជាមួយលោក ស៊ី ជីនពីង នឹងផ្ដោតជាពិសេសលើពាណិជ្ជកម្ម។ សង្រ្គាមអ៉ីរ៉ង់ និងតៃវ៉ាន់សុទ្ធសឹងតែជាបញ្ហាស្មុគស្មាញដែលអាចធ្វើឱ្យភាពតានតឹងក្នុងទំនាក់ទំនងរវាងមហាយក្សទាំង២ អាចផ្ទុះឡើងជាថ្មី៕