(ឡាហានវ៉ាន)៖ នាយកទីភ្នាក់ងារស៊ើបការណ៍សម្ងាត់អាមេរិក CIA លោក John Ratcliffe កាលពីថ្ងៃព្រហស្បតិ៍ ទី១៤ ខែឧសភា ឆ្នាំ២០២៦ បានប្រគល់សារពីប្រធានាធិបតីអាមេរិក លោក ដូណាល់ ត្រាំ ទៅឱ្យក្រុមមន្ត្រីកំពូលៗរបស់គុយបា ក្នុងទីក្រុងឡាហាវ៉ានថាសហរដ្ឋអាមេរិកនឹងធ្វើកិច្ចសហប្រតិបត្តិការលើបញ្ហាសេដ្ឋកិច្ច និងសន្តិសុខ លុះត្រាតែគុយបាធ្វើកំណែទម្រង់ដ៏ធំណាមួយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ដំណើរទស្សនកិច្ចរបស់លោក Ratcliffe ត្រូវបានរាយការណ៍ថាជាដំណើរទស្សនកិច្ចលើកដំបូងបំផុតរបស់នាយក CIA ទៅកាន់គុយបា ចាប់តាំងពីមានបដិវត្តន៍កុម្មុយនិស្ត ក្នុងឆ្នាំ១៩៥៣មក និងគូសបញ្ជាក់ពីពេលវេលាដ៏កម្របំផុតនៃការទំនាក់ទំនងកម្រិតខ្ពស់រវាងក្រុមមន្ត្រីនៃប្រទេសទាំង២ផងដែរ។ មន្ត្រី CIA ម្នាក់ក្នុងលក្ខខណ្ឌមិនបញ្ចេញឈ្មោះ មិនបានប្រាប់ Reuters លម្អិតថាតើអ្វីទៅជាការធ្វើកំណែទម្រង់ ឬការផ្លាស់ប្ដូរជាក់លាក់ដែលលោក ត្រាំ កំពុងទាមទារឱ្យគុយបាធ្វើនោះទេ។

លោក Ratcliffe បានទៅដល់គុយបា ចំពេលទំនាក់ទំនងរវាងទីក្រុងឡាហាវ៉ាន និងទីក្រុងវ៉ាស៊ីនតោនកំពុងឡើងកម្ដៅ។ លោក ត្រាំបាននិងកំពុងបង្កើនការដាក់សម្ពាធលើគុយបា ជាមួយការដាក់ចេញការអនុវត្តការបិទខ្ទប់មិនឱ្យប្រេងឥន្ធនៈដឹកចូលទៅក្នុងប្រទេសមួយនេះ តាមរយៈការគំរាមដាក់ទណ្ឌកម្មលើប្រទេសណាដែលហ៊ានផ្គត់ផ្គង់ប្រេងឱ្យទីក្រុងឡាហាវ៉ាន ជាហេតុបង្កឱ្យមានការដាច់ចរន្តអគ្គិសនី និងធ្វើឱ្យសេដ្ឋកិច្ចគុយបាធ្លាក់ចូលក្នុងវិបត្តិថ្មីមួយ។

បាតុកម្មតវ៉ាបានផ្ទុះឡើងកាលពីថ្ងៃព្រហស្បតិ៍នៅក្នុងទីក្រុងឡាហាវ៉ាន កាលពីល្ងាចថ្ងៃពុធ ចំពោះការដាច់ចរន្តអគ្គិសនីដែលកំពុងបង្កការរំខានយ៉ាងខ្លាំងដល់ជីវភាពប្រចាំថ្ងៃរបស់ពួកគេ។ រដ្ឋមន្ត្រីថាមពល និងរ៉ែរបស់គុយបា បាននិយាយថាគុយបាកំពុងប្រឈមមុខអស់ប្រេងឥន្ធនៈប្រើប្រាស់ ខណៈការផ្គត់ផ្គង់អគ្គិសនីបានស្ថិតក្នុងស្ថានភាពយ៉ាប់យ៉ឺនយ៉ាងខ្លាំង។

គួរបញ្ជាក់ថា បើតាមមន្ត្រី CIA ខាងលើដដែល ក្រុមមន្ត្រីគុយបាដែលលោក Ratcliffe បានជួបក្នុងនោះរួមមានលោក Raulito Rodriguez Castro រដ្ឋមន្ត្រីមហាផ្ទៃគុយបា លោក Lazaro Alvarez Casas និងប្រមុខចារកម្មរបស់គុយបាន។ លោក ត្រាំ ធ្លាប់បានគំរាមថាគុយបានឹងក្លាយជាគោលដៅបន្ទាប់របស់សហរដ្ឋអាមេរិក បន្ទាប់ពីវ៉េណេស៊ុយអេឡា និងអ៉ីរ៉ង់៕