(ញូវដែលី)៖ អ្នកការទូតកំពូលមកពីប្រទេស BRICS បានបរាជ័យក្នុងការចេញសេចក្តីថ្លែងការណ៍រួម កាលពីថ្ងៃសុក្រសប្តាហ៍នេះ បន្ទាប់ពីកិច្ចប្រជុំរយៈពេលពីរថ្ងៃនៅទីក្រុង Delhi ដោយទុកឱ្យប្រទេសម្ចាស់ផ្ទះឥណ្ឌាបញ្ចេញតែសេចក្តីថ្លែងការណ៍ដែលបង្ហាញពីភាពខ្វែងគំនិតគ្នាប៉ុណ្ណោះ។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នាថ្ងៃសៅរ៍ ទី១៦ ខែឧសភា ឆ្នាំ២០២៦។

BRICS មានសមាជិកដូចជាប្រេស៉ីល រុស្ស៉ី ឥណ្ឌា ចិន អាហ្វ្រិកខាងត្បូង អេហ្ស៉ីប អេត្យូពី អ៉ីរ៉ង់ អារ៉ាប៊ីសាអូឌីត អេមីរ៉ាត់អារ៉ាប់រួម (UAE) និងឥណ្ឌូណេស៉ី។

ទីក្រុងតេហេរ៉ង់ ចង់ឱ្យក្រុមប្រទេសមានសេដ្ឋកិច្ចកំពុងរីកចម្រើននេះ ថ្កោលទោសសង្គ្រាមអាមេរិក និងអ៉ីស្រាអែលលើអ៉ីរ៉ង់ និងបានចោទប្រកាន់ថាសម្ព័ន្ធមិត្តរបស់សហរដ្ឋអាមេរិក បានការចូលរួមផ្ទាល់ក្នុងប្រតិបត្តិការយោធាប្រឆាំងនឹងប្រទេសរបស់ខ្លួន។ ដោយមិនបញ្ចេញឈ្មោះអេមីរ៉ាត់អារ៉ាប់ (UAE) រដ្ឋមន្ត្រីការបរទេសអ៉ីរ៉ង់ លោក Abbas Araqchi បានប្រាប់សន្និសីទសារព័ត៌មានថា សមាជិក BRICS បានរារាំងផ្នែកខ្លះនៃសេចក្តីថ្លែងការណ៍។

UAE បានច្រានចោលទាំងស្រុងនូវការចោទប្រកាន់របស់អ៉ីរ៉ង់ ដោយចាត់ទុកថាវាជាការប៉ុនប៉ងដើម្បីបង្ហាញពីភាពត្រឹមត្រូវនៃការវាយប្រហារលើ UAE ហេីយថាខ្លួនរក្សាសិទ្ធិអធិបតេយ្យភាព ផ្លូវច្បាប់ ការទូត និងយោធាយ៉ាងពេញលេញ ដើម្បីឆ្លើយតបទៅនឹងការគំរាមកំហែង ឬអំពើអរិភាពណាមួយ។

ឥណ្ឌា​ បានលេីកឡេីងក្នុងសេចក្តីថ្លែងការណ៍ និងឯកសារលទ្ធផលថា មានទស្សនផ្សេងៗគ្នាក្នុងចំណោមសមាជិកមួយចំនួនទាក់ទងនឹងស្ថានភាពនៅក្នុងតំបន់អាស៉ីខាងលិច និងមជ្ឈិមបូព៌ា។ សមាជិកបានបង្ហាញពីគោលជំហរជាតិរៀងៗខ្លួន ហើយបានចែករំលែកនូវទស្សនវិស័យជាច្រើន រាប់ចាប់ពីតម្រូវការរកដំណោះស្រាយវិបត្តិឱ្យបានឆាប់ ផ្តល់តម្លៃដល់កិច្ចសន្ទនា និងការទូតដើម្បីគោរពអធិបតេយ្យភាព និងបូរណភាពទឹកដី៕