(មូស្គូ)៖ វិមានក្រឹមឡាំង នៅថ្ងៃសៅរ៍ ទី១៦ ខែឧសភា ឆ្នាំ២០២៦ បានប្រកាសឱ្យដឹងថាប្រធានាធិបតីរុស្ស៉ី លោក វ្ល៉ាឌីមៀ ពូទីន នឹងធ្វើទស្សនកិច្ចរយៈពេល ២ថ្ងៃ ពីថ្ងៃទី១៩ ដល់ថ្ងៃទី២០ ខែឧសភា តែប៉ុន្មានថ្ងៃប៉ុណ្ណោះបន្ទាប់ពីដំណើរទស្សនកិច្ចរបស់ប្រធានាធិបតីអាមេរិក លោក ដូណាល់ ត្រាំ ទៅកាន់ទីក្រុងប៉េកាំង។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

នៅក្នុងសេចក្ដីថ្លែងការណ៍មួយ វិមានក្រឹមឡាំងបានឱ្យដឹងទៀតថាអំឡុងដំណើរទស្សនកិច្ច លោក ពូទីន នឹងពិភាក្សាជាមួយលោកប្រធានាធិបតីចិន ស៊ី ជីនពីង ពីរបៀបពង្រឹងបន្ថែមនូវភាពជាដៃគូគ្រប់ជ្រុងជ្រោយ និងកិច្ចសហប្រតិបត្តិការយុទ្ធសាស្ត្ររវាងទីក្រុងមូស្គូ និងទីក្រុងប៉េកាំង។

លោក ពូទីន និងលោក ស៊ី ជីនពីង នឹងផ្លាស់ប្ដូរទស្សនគ្នាទៅវិញទៅមកលើបញ្ហាសំខាន់ៗទាំងកម្រិតអន្តរជាតិ និងក្នុងតំបន់ ព្រមទាំងចុះហត្ថលេខាលើសេចក្ដីថ្លែងការណ៍រួមមួយនៅឯចុងបញ្ចប់នៃកិច្ចពិភាក្សា។ វិមានក្រឹមឡាំងបន្ថែមថាក្នុងពេលស្ថិតនៅទីក្រុងប៉េកាំង លោក ពូទីន ក៏មានកាលវិភាគពិភាក្សាពីកិច្ចសហប្រតិបត្តិការសេដ្ឋកិច្ច និងពាណិជ្ជកម្មជាមួយនាយករដ្ឋមន្ត្រីចិន លោក Li Qiang ផងដែរ។

គួរបញ្ជាក់ថា ដំណើរទស្សនកិច្ចរបស់លោក ពូទីន នឹងធ្វើឡើងតែប៉ុន្មានថ្ងៃប៉ុណ្ណោះបន្ទាប់ពីលោក ដូណាល់ ត្រាំ បិទបញ្ចប់ដំណើរទស្សនកិច្ចរបស់លោកទៅកាន់ចិន កាលពីថ្ងៃសុក្រកន្លងទៅនេះ ដែលជាដំណើរទស្សនកិច្ចដំបូងបំផុតរបស់ប្រធានាធិបតីអាមេរិក ក្នុងពេលជិត១ទសវត្សរ៍មកនេះ៕