(ការ៉ាកាស)៖ កាលពីថ្ងៃសៅរ៍ ទី១៦ ខែឧសភា ឆ្នាំ២០២៦ ទីភ្នាក់ងារអន្តោប្រវេសន៍នៃប្រទេសវ៉េណេស៊ុយអេឡា SAIME បានប្រកាសថា លោក Alex Saab ដែលជាសម្ព័ន្ធមិត្តរបស់អតីតប្រធានាធិបតី លោក Nicolas Maduro ត្រូវបានបញ្ជូនខ្លួនទៅកាន់សហរដ្ឋអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

លោក Saab ត្រូវបានចាប់ខ្លួននៅទីក្រុងការ៉ាកាស កាលពីខែកុម្ភៈ អំឡុងប្រតិបត្តិការរួមគ្នារវាងអាជ្ញាធរអាមេរិកនិងវ៉េណេស៊ុយអេឡា។ ការចាប់ខ្លួននោះកើតឡើង ត្រឹមមួយខែប៉ុណ្ណោះ បន្ទាប់ពីការចាប់ខ្លួនលោក Maduro ដោយកងកម្លាំងយោធាពិសេសអាមេរិក នៅរដ្ឋធានីការ៉ាកាស។ ការចាប់និងបញ្ជូនខ្លួនលោក Saab បង្ហាញពីសញ្ញានៃកិច្ចសហការកម្រិតថ្មីមួយទៀត រវាងអាជ្ញាធរអនុវត្តច្បាប់របស់អាមេរិកនិងវ៉េណេស៊ុយអេឡា ក្រោមការគ្រប់គ្រងរបស់ប្រធានាធិបតីស្តីទី លោកស្រី Delcy Rodriguez ដែលជាអតីតអនុប្រធានាធិបតីរបស់លោក Maduro។

លោក លោក Saab អាយុ៥៤ឆ្នាំ ធ្លាប់ត្រូវបានចាប់ខ្លួនពីមុនមក នៅប្រទេសប្រជុំកោះ Cape Verde កាលពីឆ្នាំ២០២០ ហើយជាប់ឃុំឃាំងនៅសហរដ្ឋអាមេរិក ពីបទសូកប៉ាន់។ នៅឆ្នាំ២០២៣ លោកត្រូវបានដោះលែងវិញ ជាថ្នូរនឹងការដោះលែងជនជាតិអាមេរិក ដែលជាប់ឃុំនៅវ៉េណេស៊ុយអេឡា។ តាមរយៈការបញ្ជូនខ្លួនត្រឡប់ទៅសហរដ្ឋអាមេរិក លោក Saab អាចផ្តល់​ព័ត៌មានដល់អាជ្ញាធរអាមេរិក ដើម្បីពង្រឹងសំណុំរឿងព្រហ្មទណ្ឌរបស់ពួកគេ ប្រឆាំងនឹងលោក Maduro។

គួរបញ្ជាក់ថា លោក Maduro និងភរិយាលោកស្រី Cilia Flores ត្រូវបានចាប់ខ្លួននាំទៅទី​ក្រុងញូវយ៉ក កាលពីខែមករា ដើមឆ្នាំនេះ ដើម្បីប្រឈមមុខជាមួយ​បទចោទប្រកាន់មួយចំនួន រួមមានទាំងការគប់គិតប្រព្រឹត្តអំពើភេរវកម្មគ្រឿងញៀន។ យ៉ាងណាមិញ អ្នកទាំងពីរបានច្រានចោលការចោទប្រកាន់ទាំងអស់៕